Reseta

Lentegas na fornu

E reseta aki ta pa ± 6 persona

Herebé e lentegas ku ½ telep di salu te ora e bira moli i e awa a seka tambe. Machiká e lentegas. Hasa e sèleri huntu ku e siboyo pa despeus bo agregá esakinan na e lentegas machiká i tambe e lechi, oregano i panermel.

Meskla nan bon. Por agregá un tiki buyon si e ta falta un poko smak. Hunta un plancha plat  (haltura ± 3 cm) i plama e meskla eiden. Hinka e plancha den fornu 300°C te ora e rant bira bruin. Traha un sous sigun bo smak i sirbi pida lentegas ku aros i salada.

Balchi di bonchi wowo pretu of di garbanzo

Herebé un kùp di bonchi te ora e bira moli. Skore e awa i machiké agregando ½ telep di salu òf boyon vegetal. Kòrta chiki chiki: 1 siboyo, 1 promèntòn, 1 djente di konofló i 5 taki di silantro. Agregá esakinan huntu ku un webu batí na e bonchi machiká. Meskla awor tur kos bon i keda agregá panermel tiki tiki te ora e mansa sera. Laga e meskla para un ratu pa despeus bo forma e balchinan. E balchinan ta bai riba un plancha na zeta den fornu na 300°C te ora nan bira bruin. Por hasa nan tambe den zeta.

Enbes di webu bo por usa un kuchara di ariña di linasa mesklá den 3 kuchara di awa.

Sopi di bonchi kashipete (lima beans)

Herebe 1 paki di bonchi den awa ku konofló te ora e awa yena ku skuma (den ± ½ ora). Skore e awa afó i bolbe yena awa limpi pa e bonchi kaba di bira moli. (awa herebe) Hasa den poko zeta, 1 siboyo i 1 promèntòn ambos chikitu kòrta i agregá esakinan na e bonchi ku ya a bira moli. Awor bo ta bai dunele mas smak ku: un tiki netumuskat, komino, buyon, ketjap manis, pasta di tomati i un pika henter. Laga e sòpi kushina bon pa e smak penetrá. Ora e sòpi ta kla, nos ta kibra 1 webu den un kopi i agregá esaki den dje. Por pone 1 webu  pa kada persona ku ta bai kome. Ora bo pone e webu den e sòpi, bo ta tapa e wea te ora e webu kaba di kushiná. E idea ta pa e webunan no kibra ! Paga tino pa e bonchi no kima den e bòm!

Granola

Meskla tur loke ta seku huntu. Meskla tur loke ta likido huntu. Basha e meskla-likido tiki tiki den e meskla-seku mientras ku bo man bo ta brua tur kos poko poko huntu. Plama esaki den un plancha i manda e plancha fornu na 250°C te ora e meskla bira bruin i seku. Boltu e meskla ku frekuensia pa e no kima. Esaki ta e granola ku bo por kome por ehèmpel ku lechi, estilo cornflakes ku lechi.

Puding di chukulati

Pone tur  ingrediente den blender i laga nan bati bon. Pone esaki den eiskast pa sirbi’é friu.

Aros brua

2 kùp di aros integral kushina ku 2 telep di buyon, 2 kuchara di zeta, 2 kuchara di soya sous. Kushiná e aros un dia prome òf un par di ora prome, pa  e fria, i e ta brua mihó. 1 paki di sosechi vegetal di slais, hasanan den un tiki zeta i 1 tenchi konoflo i un tiki ketchap manis. 1 paki taugé (spuitjes di nasi gori). Herebe awa ku 1 kuchara di salu, paga e stof i basha e taugé den e awa,  lage para 3 minüt. Despeus ta skore esaki bon i den panchi kayente bo ta agregá un tiki zeta i ketchap manis ku bo ta meskla ku e taugé.

1 prei, i siboyo, i promèntòn, 2 taki di seleri di slais hasanan den un tiki zeta ku ketchap manis.

1 paki di brokoli òf un kolo chines chiki òf ½ kolo blanku, stom nan djis pa nan keda un tiki bròs ku un tiki buyon pa duna smak.

1 wortel raspá: boltu esaki den un tiki zeta kayente i ketchap manis.

Kada bes ku nos hasa un di e bèrduranan nos ta bruanan den e aros te ora nos kaba di brua tur e ingredientenan. Nos aros brua ta kla.