Les di sabbatskol kuartaal 1, aña 2022, Titula: Den E Ultimo Dianan Aki: E mensahe di Hebreo

Les 4: Hesus, Nos Fiel Ruman

No tin Bergwensa pa Yama Nan Rumannan

Lesa pa e siman aki:

: Lev. 25:25-27; Heb. 2:14-16; Heb. 11:24-26; 1 Kor. 15:50; Heb. 5:8, 9; Heb. 12:1-4.

TEKSTO PRINSIPAL:

"Asina anto, komo ku e yunan ta kompartí den karni i sanger, E mes tambe a tuma parti na e mesun manera, asina ku pa medio di morto E por a destruí esun ku tabatin poder riba morto, esta, diabel"(Hebreo 2:14, Beibel Santu).

djaluna, 17-01-2022

Hebreo ta bisa ku Hesus no tabatin bergwensa di yama nos Su rumannan (Heb. 2:11). Apesar di ta un ku Dios, Hesus a brasa nos komo parti di Su famia. E solidaridat akí ta den kontraste ku e brongosamentu publiko ku e lesadónan di Hebreo a sufri den nan komunidatnan (Heb. 10:33).

Lesa Hebreo 11:24-26. Na ki manera e desishon di Moisés ta un ehèmpel di loke Hesus a hasi pa nos?

Bo a imaginá kiko e tabata nifiká pa Moisés wòrdu yamá "e yu di fárao su yu muhé'? E tabata un figura poderoso den e emperio di mas poderoso den e tempu ei. El a risibí e entrenamentu sivil i militar di mas haltu i a bira un personahe remarkabel. Esteban ta bisa ku Moisés tabata " 'di poder den palabra i echo' " (Ech. 7:22). Ellen G. White tambe ta bisa ku e tabata "un favorito serka e ehérsitonan di Egipto" i ku fárao "tabata determiná pa hasi su nietu adoptive su susesor riba e trono" (wak Patriarchs and Prophets, p. 245). Tòg Moisés a bandoná tur e privilegionan akí ora ku el a skohe pa identifiká su mes ku e israelitanan, un nashon di katibu sin edukashon i poder.

Lesa Mateo 10:32, 33; 2 Timoteo 1:8, 12; i Hebreo 13:12-15. Kiko Dios ta pidi di nos?

Esaki tabata partí di e problema pa e lesadónan di Hebreo. Despues di a sufrí persekushon i rechaso, hopi di nan a kuminsá sinti bergwensa di Hesus. Pa medio di nan aktonan algun tabata den peliger di pone Hesus "na bergwensa publiko" na lugá di honr'E (Heb. 6:6). Pues, Pablo konstantemente ta bisa e lesadónan pa "tene duru" na e "konfeshon" di nan fe (Heb. 4:14, , Heb. 10:23, , Beibel Santu).

Dios ke pa nos rekonosé Hesus komo nos Dios i nos ruman. Komo nos Redentor, Hesus a paga nos debe; komo nos ruman, Hesus a mustra nos e kaminda ku nos mester biba pa asina nos por "bira konforme e imagen di Su Yu, pa E por ta e primogénito den hopi ruman" (Rom. 8:29).

Pensa un ratu riba e desishon ku Hesus mester a tuma pa e por aseptá nos komo"rumannan." Di kon loke Hesus a hasi ei tabata rebahá Su mes muchu mas tanto kompará ku loke Moisés a hasi, i kiko esaki ta siña nos tokante di Dios Su amor pa nos?

43