les di Sabbatskol
otro idioma
Les di sabbatskol kuartaal 1, aña 2022, Titula: Den E Ultimo Dianan Aki: E mensahe di Hebreo
Les 8: Hesus, e Mediadó di e Aliansa Nobo
E Aliansa Nobo A Resolvé e Problema di e Kurason
Lesa pa e siman aki:
Heb. 7:11-19; Heb. 8:10-12; Jer. 31:31-34; Heb. 8:1-6; Eks. 24:1-8; Ezek. 36:26, 27.
TEKSTO PRINSIPAL:
" Ma awor El a optené un sirbishi mas ekselente, komo ku E ta tambe e Mediador di un mihó aliansa, kual a wòrdu stablesí riba mihó promesanan" (Hebreo 8:6, Beibel Santu).
djaweps, 17-02-2022
Kompará e promesanan di e aliansa nobo di Jeremias 31:33 i Ezekiel 36;26, 27. Di ki manera nan ta relashoná ku otro?
E promé dokumento di e aliansa a wòrdu skirbí pa Dios riba tablanan di piedra i a wòrdu depositá den e arka di e aliansa komo un testigu importante di Dios Su aliansa ku Su pueblo (Eks. 31:18, , Deut. 10:1-4). Sinembargo, dokumentonan skirbí den piedra por wòrdu kibrá; i skròlnan, manera Jeremias a eksperensiá, por wòrdu kòrtá i kimá (Jer. 36:23).
Pero Dios awor lo skirbi Su lei den e kurason di e hendenan. E kurason ta referí na e mente, e órgano di memoria i komprondementu (Jer. 3:15, , Deut. 29:4), i spesialmente kaminda desishonnan konsiente ta wòrdu tumá (Jer. 3:10, , Jer. 29:13).
E promesa akí no a simplemente sigurá akseso na i konosementu di e lei pa tur hende. Tambe, mas importante ainda, e tabata pa trese un kambio den e kurason di e nashon. E problema di Israel tabata ku nan piká tabata grabá "ku un pen di heru," "ku un punta di djamanta ... riba e tabla di nan kurason" (Jer. 17:1, , Beibel Santu). Nan tabatin un kurason duru (Jer. 13:10, , Jer. 23:17); p'esei, tabata imposibel pa nan por hasi loke ta korekto (Jer. 13: 23).
Jeremias no a anunsiá un kambio di e lei, pasobra e problema di Israel no tabata e lei pero e kurason. Dios tabata ke pa Israel su fieldat por ta un kontesta yen di gratitut na loke El a hasi pa nan; pues, El a duna e Dies Mandamentunan na nan ku un prólogo históriko, ekspresando Su amor i kuido pa nan (Eks. 20:1, 2). Dios tabata ke pa Israel por obedesé Su leinan manera un rekonosimentu di ku E tabata ke lo mihó pa nan, un bèrdat revelá den nan gran liberashon for di Egipto. Nan obedensia lo mester tabata un ekspreshon di gratitut, un manifestashon di e realidat di nan relashon.
Meskos ta bèrdat pa nos awe. Hesus Su amor i kuido den muri pa nos ta un prólogo di e aliansa nobo (Lukas 22:20). Bèrdadero obedensia ta bini for di kurason komo un ekspreshon di amor (Mat. 22:34-40). E amor akí ta e marka ku ta distinguí e presensia di e Spiritu Santu den bida di e kreyente. Dios ta basha Su amor riba nos pa medio di Su Spiritu Santu (Rom. 5:5), kual ta wòrdu ekspresá den amor (Gal. 5:22).
Si Israel antiguo mester a stima Dios, asta sin e komprondementu di Kristu Su morto, di kon nos lo no tin ku stima Dios aún mas tantu ku nan? Kon obedensia ta hasi e realidat di e amor ei manifestá.
94