les di Sabbatskol
otro idioma
Les di sabbatskol kuartaal 2, aña 2022, Titula: GÉNESIS
Les 10: Yakob-lsrael
Mas Estudio:
Lesa pa e siman aki:
Gén. 32:22-31; Hos. 12:3, 4; Yer. 30:5-7; Génesis 33; Gén. 34:30-35: 29.
TEKSTO PRINSIPAL:
"E ora ei e hòmber a bis'é: 'Lo bo no yama Yakob mas; pero Israel pasobra bo a lucha ku Dios i ku hende i bo a sali ganadó"' (Génesis 32:28).
djabierne, 03-06-2022
Lesa Ellen G. White, 'The Night of Wrestling', p. 195-203, den Patriarchs and Prophets. 'Yakob su eksperensia durante e anochi di luchamentu i angustia ei ta representá e prueba ku e pueblo di Dios mester pasa djis promé ku e segundo binida di Kristu. Asina e eksperensia di e pueblo di Dios lo ta den nan lucha final ku e podernan di maldat. Dios lo tèst nan fe, nan perseveransia, nan konfiansa den Su poder pa liberá nan. Satanas lo hasi esfuerso pa terorisá nan ku e pensamentu ku nan kasonan ta sin speransa; ku nan pikánan tabata muchu grandi pa risibí pordon. Nan lo tin un sentido profundo di nan defektonan, i ora nan repasá nan bida, nan speransa lo senk. Pero rekordando e grandesa di Dios Su miserikòrdia, i nan propio arepentimentu sinsero, nan fe lo no faya pasobra Dios no a kontestá nan orashonnan inmediatamente. Nan lo tene duru na e fortalesa di Dios, manera Yakob a tene duru na e Angel, i e lenguahe di nan alma lo ta: "Lo mi no laga Bo bai, te ora Bo bendishoná mi"....
'Sinembargo, e historia di Yakob ta un siguransa ku Dios lo no tira afó esnan ku tabata traishoná den piká, sino ku a bira bèk na djE ku berdadero arepentimentu. Tabata pa medio di sumishon propio i fe ku ta konfia, ku Yakob a gana loke el a faya di gana pa medio di konflikto den su mes forsa. Asina Dios a siña Su sirbidó ku poder i grasia divino so por a dun'é e bendishon ku e tabata anhelá. Asina lo ta ku esnan ku ta biba den e último dianan. Ora peligernan ta rondoná nan, i desesperashon ta probechá di nan alma, nan mester dependé únikamente riba e méritonan di e ekspiashon. Nos no por hasi nada di nos mes.'-Ellen G. White, Patriarchs and Prophets, p. 201-203.
Pregunta pa Diskushon:
1. Di kon Yakob su debilidat ta e okashon pa e grasia di Dios? Kon e eksperensia di Yakob ta relatá na e deklarashon di Pablo: "ora mi ta débil, ta e ora ei mi ta fuerte" (2 Kor. 12:10)?
2. Di kon, bo ta kere, Beibel ta revelá asina tantu detaye baho tokante bida di hopi di su personahenan? Kiko lo ke asentuá hasiendo esaki? Ki mensahe nos por saka for di dje?
3. Reflekshoná mas riba e asuntu di idolatria. Kua ta e ídolonan di nos kultura, nos sivilisashon? Kon nos por sigurá ku nos no ta adorando kualke otro hende òf kualke otro kos ku no ta Señor?
119