Les di sabbatskol kuartaal 2, aña 2022, Titula: GÉNESIS

Les 13: Israel na Egipto

E Speransa di e Tera Primintí

Lesa pa e siman aki:

Génesis 46; Rom. 10:12, 13; Génesis 47; Génesis 48; Echonan 3:25, 26; Génesis 49; Fil. 2:10; Gén. 49:29-50:21.

TEKSTO PRINSIPAL:

"E israelitanan a keda biba na Egipto, nan a tuma e region Goshen pa nan. Ei nan a haña mashá hopi desendiente" (Génesis 47:27).

djaweps, 23-06-2022

Lesa Génesis 49:29-50:21. Ki gran tema di speransa nos ta haña den e konklushon di e buki di Génesis?

E konklushon di Génesis ta konsistí di tres evento ku ta yená ku speransa. Na promé lugá, ta e speransa ku Israel lo regresá na e Tera Primintí. Moises, e outor di Génesis, ta deskribí e morto i entiero di Yakob i Jozef komo eventonan ku ta mustra na e Tera Primintí. Inmediatamente despues di su bendishon i profesia riba e diesdos tribunan di Israel (Gén. 49:28), Yakob ta pensa riba su morto i ta enkargá su yunan pa der'é na Kanaan, den e kueba di Makpela, kaminda a dera Sara (Gén. 49:29-31).

E relato ku ta deskribí e proseshon funerario den direkshon di Kanaan ta bira un prekursor na, vários siglo despues, e Eksodo for di Egipto.

Di dos, ta e speransa ku Dios lo kambia malu den bon. Despues di morto i entiero di Yakob, e rumannan di Jozef ta preokupá tokante nan futuro. Nan tin miedu ku Jozef lo tua su revancha awor. Nan ta bin serka Jozef i buig te na suela su dilanti, kla pa bira su sirbidónan (Gén. 50:18), un senario ku ta similar na e soñonan profétiko di Jozef. Jozef ta trankilisá nan i ta bisa nan pa 'no tene miedu' (Gén. 50:19), un frase ku ta referí na futuro (Gén. 15:1); pasobra loke tabata 'planiá pa malu' kontra dje, 'Dios a plani'é pa bon' (Gén. 50:20, , Beibel Santu), i a kambia e kurso di eventonan den direkshon di salbashon (Gén. 50:19-21; kompará ku Gén. 45:5, 7-9). Es desir, asta apesar di asina hopi fayo humano, e providensia di Dios lo prevalesé.

Di tres, ta e speransa ku Dios lo salba humanidat kaí. E storia di Jozef su morto den e último versíkulo akí di Génesis ta mas amplio ku solamente e morto di Jozef. Ta straño pa bisa ku Jozef no ta ordená pa dera su wesunan. En kambio e ta mustra na e momento ku "Siguramente Dios lo perkurá pa boso, i boso mester hiba mi wesunan for di aki­nan" (Gén. 50:25, , Beibel Santu), loke nan a hasi, añanan despues, den obediensia direkto na e palabranan ei (wak Eks. 13:19). Finalmente, e speransa di e Tera Primintí, Kanaan, ta un símbolo, un prekursor, di e speransa final di salbashon, di restourashon, di un Herusalem nobo den un shelu nobo i un tera nobo speransa final di nos tur, un speransa ku e morto di Silo a hasi sigur.

Lesa Revelashon 21:1-4. Kon e versíkulonan aki ta representá e speransa di mas grandi ku nos tin? Sin e promesa akí, ki speransa nos tin si no ta morto so komo e fin di tur nos problemanan?

154