Les di sabbatskol kuartaal 2, aña 2022, Titula: GÉNESIS

Les 3: Kain i Su Herensia

E Krímen

Lesa pa e siman aki:

Kain i su·Herensia Génesis 4, Hebr: 11:4, Mik 6:7, , Isa. 1: 11, 1 Kor: 10:13, 1 Huan 3:12, , Génesis 5, Gén. 6:1-5.

TEKSTO PRINSIPAL:

"Pero si bo laga di hasi bon, piká ta lur tras di bo porta, kla pa ataká bo, ma abo mester sa di domin'é" (Génesis 4:7).

djamars, 12-04-2022

Lesa Génesis 4:3-8. Kiko ta e proseso ku a hiba Kain na mata su ruman hòmber? Wak tambe 1 Huan 3:12.

Kain su reakshon ta dobel: "Kain a kunsumí; sera kara" (Gén. 4:5). Kain su rabia tabata dirigí, parse, na Dios i na Abel. Kain tabata rabiá ku Dios pasobra e tabata pensa ku e tabata víktima di un inhustisia i rabiá ku Abel pasobra e tabata yalurs riba su ruman. Yalurs di kiko? Djis e ofrenda? Seguramente, mas kos tabata tumando lugá tras di kortina, ku loke ta revelá den e par di teksto akí. Loke sea e problema tabata, Kain tabata deprimí pasobra Dios no a aseptá su ofrenda.

E dos preguntanan di Dios den Génesis 4:6 ta relatá na e dos kondishonnan di Kain. Nota ku Dios no ta akusá Kain. Manera ku Adam, Dios ta hasi pregunta, no pasobra E no sa e kontestanan, sino pasobra E ke pa Kain wak su mes i despues komprendé e motibu pa su propio kondishon. Manera semper, Señor ta trata na redimí Su pueblo kaí, asta ora nan fay'E abiertamente. E ora ei, despues di hasi e preguntanan akí, Dios ta konsehá Kain.

Promé, Dios ta urgi Kain pa 'hasi bon', pa komportá na e forma korekto. E ta un yamada pa arepentimentu i pa kambia su aktitut. Dios ta primintí Kain ku E lo 'asept'é' i pordon'é. Den un sentido e ta bisando ku Kain por tin aseptashon ku Dios, pero mester hasié bou di kondishonnan di Dios, no di Kain.

Na otro banda, "si bo laga di hasi bon, piká ta lur tras di bo porta, kla pa ataká bo, ma abo mester sa di domin'é" (Gén. 4:7). Dios Su konseho a revelá e rais di piká, i ta hañ'é den Kain mes. Aki, atrobe, Dios ta konsehando Kain, tratando na gui'é den e kaminda ku e mester bai. E di dos palabra di konseho di Dios ta konserní e aktitut pa tuma pa ku e piká akí, ku ta na porta i kende ta "kla pa ataká bo". Dios ta rekomendá dominio propio: "ma abo mester sa di domin'é". E mesun prinsipio ta resoná den Hakobo, ora e ta splika ku "un hende ta hañ'é den tentashon dor di su mes mal deseonan ku ta sedusié i koutiv'é" (Hakobo 1:14). E evangelio ta ofresé nos e promesa di, no solamente e pordon di piká, sino viktoria riba dje tambe (Wak 1 Kor. 10:13). Al final, Kain no tabatin niun hende pa kulpa pa su piká sino su mes. Generalmente no ta asina ku nos tur tambe?

Kiko e storia desafortuná ei ta siña nos tokante boluntat liber I tokante kon Dios lo no fòrsa nos pa obedesé?

32