Les di sabbatskol kuartaal 2, aña 2022, Titula: GÉNESIS

Les 7: E Pakto ku Abraham

E Señal di e Aliansa Abrahámiko

Lesa pa e siman aki:

Génesis 15-19:29; Rom. 4:3, 4, 9, 22; Gal. 4:21-31; Rom 4:11; Rom. 9:9; Amos 4:11.

TEKSTO PRINSIPAL:

I Abram a bisa: 'O Señor DIOS, kiko lo Bo duna mi, siendo ku mi no tin yu, i ku ta Eliezer di Damasko ta e eredero di mi kas?"' (Génesis 15:2).

djamars, 10-05-2022

Lesa Génesis 17:1-19 i Romanonan 4:11. Kiko ta e nifikashon spiritual i profétiko di e rito di sirkunsishon?

E falta di fe di Abram, manera nos ta mira den e storia anterior (Génesis 16), a kibra e fluho di Abram su biahe spiritual ku Dios. Durante e tempu ei Dios tabata ketu. Pa promé biaha awor, Dios ta papia ku Abram atrobe. Dios ta rekonektá ku Abram i ta tres'é bèk na e punto ora El a sera e aliansa kuné (Gén. 15:18).

Awor, sinembargo, Dios ta dun'é e señal di e aliansa ei. Eruditonan a diskutí e nifikashon di sirkunsishon pa hopi tempu, pero pasobra e rito di sirkunsishon ta envolví deramamentu di sanger (wak Eks. 4:25), por komprend'é den konteksto di sakrifisio, ku ta nifiká ku a atribuí hustisia na dje (kompará ku Rom. 4:11).

Ta signifikante tambe ku ta deskribí e aliansa akí, indiká pa sirkunsishon, den·términonan ku ta mustra bèk na e promé profesia di e Mesías (kompará Gén. 17:7 ku Gén. 3:15). E paralelo entre e dos tekstonan ta sugerí ku e promesa di Dios na Abram ta konserní mas ku solamente e nasementu físiko di un pueblo; e ta kontené e promesa spiritual di salbashon pa tur e pueblonan di tera. I e promesa di e "aliansa eterno" (Gén. 17:7) ta referí na e obra di e simia mesiániko, e sakrifisio di Kristu ku ta sigurá bida eterno na tur ku reklam'é pa medio di fe i tur loke fe ta enserá (kompará Rom. 6:23 i Tito 1:2).

Kuriosamente, e promesa akí, di un futuro eterno, ta kontené den e kambio di nòmber di Abram i Sarai. E nòmbernan di Abram i Sarai tabata referí solamente na nan státus aktual: Abram ta nifiká 'tata eksaltá' i Sarai ta nifiká 'mi prenses' (e prenses di Abram). E kambio di nan nòmbernan den 'Abraham' i 'Sara' tabata referí na futuro: Abraham ta nifiká 'tata di hopi nashon' i Sara ta nifiká 'e prenses' (pa tur hende). Di forma similar, pero no sin algun ironía, e nòmber di Isak ('e lo hari') ta un rekordatorio di e harimentu di Abraham (e promé harimentu registrá den Skritura, Gén. 17:17); e ta un harimentu di duda òf kisas, di asombro. Di kualke manera, aunke el a kere den loke Señor a primintié klaramente, Abraham ainda tabata lucha ku biba den fe i konfiansa.

Kon nos por siña sigui kere asta ora, tin biaba, nos ta lucha ku e kreensia ei, manera Abraham a hasi? Di kon ta importante pa nos no entregá, apesar di momentonan di duda?

80