les di Sabbatskol
otro idioma
Les di sabbatskol kuartaal 2, aña 2022, Titula: GÉNESIS
Les 9: Yakob, e usurpadó
E Gañadó Gañá
Lesa pa e siman aki:
Gén. 25:21-34, , Gén. 28:10-22, , Gén. 11:1-9, , Gén. 29:1-30, , Gén. 30:25-32.
TEKSTO PRINSIPAL:
"'Ku rason e yama Yakob!' Esou a grita. 'Ya ta di dos bia ku e ta kohe mi kabes abou! Promé el a kita e derecho di yu mayó for di mi i awor el a kita mi bendishon. Bo no a keda ku ningun bendishon pa mi?"' (Génesis 27:36).
djamars, 24-05-2022
Lesa Lesa Génesis 29:1-30. Kon i pa kiko Dios ta permití e desepshon di Laban? Ki lès Yakob a siña?
E promé kos ku Yakob ta mira ora e yega na e lugá di destinashon ta un piedra, kisas un señal ku ta mustra bèk na e piedra di Betel, ku tabata nifiká e presensia di Dios (Gén. 28:18, 19). Ta e piedra akí, despues di tur kos, lo duna Yakob e oportunidat di interaktuá ku Raquel. Ora Yakob tende for di e wardadónan di karné ku Raquel ta biniendo ku e karnénan pa laga e tou bebe awa, e ta urgi e wardadónan pa kita e piedra. Nan ta nenga, loke ta duna Yakob e oportunidat pa hasié su so, i pa introdusí su mes na Raquel (Gén. 29:11).
Raquel a reakshoná dor di kore bai serka su famia. E promé kontakto akí entre Yakob i Raquel tabata produktivo 'Yakob tabata stima Raquel' (Gén. 29:18), asina tantu ku e shete aña ku el a traha pa Laban a kambio di Raquel tabata meskos ku 'un par di dia' (Gén. 29: 20).
Sinembargo, despues di e shete aña akí, Yakob ta engañá. Riba e anochi di kasamentu, ta Lea, e ruman muhé mayó, i no Raquel, Yakob ta deskubri den su kama. Probechando di e konfushon di e fiesta i di e emoshon i vulnerabilidat intenso di Yakob, Laban a logra e triki akí. Interesante pa bisa ku Yakob ta usa e mesun palabra básiko 'gaña' (Gén. 29:25) ku Isak a usa pa karakterisá komportashon di Yakob pa ku su tata i su ruman hòmber (Gén. 27:35).
Nota ku e mesun pensamentu ta impliká tambe den lex talionis (lei di represaya) 'wowo pa wowo, djente pa djente' (Eks. 21:24; kompará ku Gén. 9:6), loke ta fòrsa esun kulpabel pa identifiká su víktima den sen tido ku esun kulpabel ta enfrentá loke e víktima a hasi. Den un forma similar, e ora ei, loke Yakob a hasi ku un otro hende, a hasi kuné awor. Yakob ta komprendé awor kiko ta nifiká ta víktima di engaño. Irónikamente, Dios ta siña Yakob tokante su propio engaño a traves di e engaño di Laban. Aunke Yakob komo 'gañadó' (Gén. 27:12) sa bon kiko engaño ta nifiká, e ta sorprendí ora e ta víktima di engaño. Asina, e ta hasi e pregunta: "Di kon...bo a gaña mi?" (Gén. 29:25), loke ta mustra ku e sa ku engaño ta robes.
Aunke Yakob tabata e gañadó, nan a gaña e mes. Kon nos por siña konfia Dios ora nos no ta mira ku ta hasi 'hustisia', ora nos mira ku no ta kastigá hende lm ta hasi malo, òf ora nos ta mira esun inosente ta sufri?
104