les di Sabbatskol
otro idioma
Les di sabbatskol kuartaal 3, aña 2022, Titula: Den e krisol ku Kristu
Les 2: E Krisolnan Ku ta Bin
E Krisolnan Ku ta Bin
Lesa pa e siman aki:
1 Pe. 4:12–19; 1 Pe. 5:8–11; Rom. 1: 21–32; Jer. 9:7–16; 2 Kor. 12:7–10.
TEKSTO PRINSIPAL:
“Stimánan, no sea sorprendí pa motibu di e kandela di prueba ku tin meimei di boso, ku ta bin riba boso pa boso ser probá, komo si fuera ta algu straño ta pasa ku boso” (1 Pedro 4:12,13).
sabbat, 02-07-2022
Den laboratorionan di kímika hopi biaha hende ta pone vários material den un baki chikitu i ta keinta nan te na temperaturanan ekstremo. Segun ku e baki ta bira mas kayente, e materialnan ta sea dirti, bira lalilali, skupi, òf ta kima di forma briante, dependiendo riba di kiko nan ta trahá. Nan ta yama e baki un krisol.
Ta definí un krisol den dikshonario komo (1) un baki usá pa dirti un supstansia ku ta rekerí un grado haltu di kayente, (2) un tèst severo, (3) un lugá òf situashon den kua forsanan konsentrá ta fòrsa interakshon pa kousa òf influensiá kambio òf desaroyo.
E definishonnan akí ta duna nos tambe un persepshon útil den loke ta sosodé den nos bida spiritual. E siman akí nos lo enfatisá algun motibu pa kua di ripiente nos por haña nos mes bou di preshon i ta eksperensiá tèstnan den lugánan den kua sirkunstansianan ta pone nos kambia, desaroyá, i krese den karakter. Esaki lo yuda duna nos un konsiensia di loke Dios ta hasiendo den nos bida asina ku ora nos drenta den un krisol, nos lo tin un idea di kon pa reakshoná.
Un Bista Riba e Siman:
Kiko ta e kousanan di e momentonan difísil ku nos ta eksperensiá a lo largu di nos bida?
Studia e lès di e siman akí pa prepará pa Sabat, 9 di yüli.