Les di sabbatskol kuartaal 3, aña 2022, Titula: Den e krisol ku Kristu

Les 6: Luchando Ku Tur Energia

E Spiritu di Bèrdat

Lesa pa e siman aki:

Huan 16:5-15; Kol. 1:28, 29; 1 Pedr. 1:13, , Mat. 5:29; Génesis 32.

TEKSTO PRINSIPAL:

"Esei ta meta di mi lucha i di e trabou duru ku mi ta hasi, ku yudansa di poder di Kristu ku ta traba fuertemente den mi" (Kolosensenan 1:29).

djadumingu, 31-07-2022

Bo a yega di resa: "Por fabor, Dios, hasi mi bon!" pero parse ku tiki kos ta kambia? Kon ta posibel ku nos por resa pa e poder transformadó di Dios pa obra denter di nos, ma nos bida parse ta keda mesun kos? Nos sa ku Dios tin rekurso sobrenatural ilimitá ku E ta ofresé nos ansioso i gratuitamente. Realmente nos ke tuma bentaha di tur, i tòg, nos bida parse no ta kambia den un forma ku ta pas ku loke Dios ta ofresiendo.

Di kon.? Un motibu, di forma alarmante, ta simpel: Miéntras e Spiritu tin poder ilimitá pa transformá nos, ta posibel pa medio di nos mes eskohonan pa restringí loke Dios por hasi.

Lesa Huan 16:5-15. Den e pasashi akí, Hesus ta yama Spiritu Santu e "Spiritu di bèrdat" (Huan 16:13). Kiko esaki ta impliká ku Spiritu Santo ta hasi pa nos?

Miéntras Spiritu Santu por trese e bèrdat pa nos tokante nos pekaminosidat, E no por pone nos repentí. E por mustra nos tambe e bèrdat di mas grandi tokante Dios, ma E no por fórsa nos pa kere of obedes'é. Si Dios a obligá nos den asta e forma di mas leve, nos lo a pèrde nos boluntat líber, i Satanas lo a akusá Dios di manipulá nos mente i kurason i di e manera ei por akusá Dios di traha trampa den e gran kontroversia. Ora e gran kontroversia a kuminsá den shelu, nos Tata no a obligá Satanas òf kualke di e angelnan pa kere ku E tabata bon i hustu òf obligá e angelnan pa repentí. I den e Hòfi di Eden, ora asina tantu kos tabata den wega atrobe, Dios a aklará e bèrdat tokante e palu meimei di e hòfi hopi bon, ma no a prevení Eva i Adam di ehersé nan boluntat líber pa desobedesé. Dios lo no aktua niun tiki diferente ku nos awendia. Asina, Spiritu Santu ta presentá e bèrdat tokante Dios i piká i despues e ta bisa: "En bista di loke Mi a mustra bo, kiko lo bo hasi awor?"

Ta mesun kos ora nos ta den e krisol. Tin biaha e krisol tei presisamente pasobra nos no a obedesé òf a repentí di nos pikánan. Pa nos Tata obra den kasonan asina, nos mester skohe konsientemente pa habri e portanan di repentimentu i obediensia pa asina e poder di Dios drenta i transformá nos.

Ki konvikshonnan e "Spiritu di bèrdat" a trese pa bo resientemente? Kon bon bo ta skuchando na Su bos? I, mas importante ainda, kua eskoho bo ta hasiendo ku bo boluntat liber?

66