Les di Sabbatskol

djadumingu, 21-08-2022

E gran eskritor ruso Fyodor Dostoyevski tabata sentensiá na morto, simplemente pa despues kambia e sentensia na último momento. El a pasa vários aña den prizón na su lugá. Papiando tokante su eksperensia di prizón, el a skirbi: "Kere te na fin, asta si tur hende dual i bo a keda e úniko fiel; trese bo ofrenda asta e ora ei i alabá Dios den bo soledat." Den e lèsnan akí ya nos a mira kon Pablo a soportá oposishon i persekushon inkreibel. Pero awor e ta sintá den un prizón romano. I tòg e no ta depresivo; en kambio, e ta skirbi ku anhelo pa kurashá e kreyentenan na Filipo.

Lesa Filipensenan 4:4-7. Kon bo ta kere ku Pablo lo por a skirbi kosnan asina ora e mes tabata sintá den un prizon? Den e pasashi aki, kiko ta e klavenan pa haña e "pas di Dios"?

Un kos ta, ta kontentu ora tur kos ta bai bon. Pero Pablo ta atvertí nos pa ta kontentu semper. Esei por zona straño. Si nos tuma loke Pablo ta skirbi literalmente, tin dos implikashon kritiko pa nos.

Na promé lugá, si nos mester ta kontentu semper, e mester nifiká ku nos mester ta kontentu asta ora sirkunstansianan no ta parse di ta duna nos kualke motibu pa ta kontentu. Di dos, si nos mester ta kon­ tentu semper, e mester nifiká tambe ku nos mester siña ta kontentu na momento ku nos no tin gana.

Pablo ta yama nos pa alabá Dios aunke hopi biaha por parse bastante innatural pa nos. E por asta parse irashonal. Pero manera nos lo mira, ta presisamente pasobra tin momento ora e ta parse irashonal, e ta yama nos pa ta kontentu. Ku otro palabra, alabansa ta un akto di fe. Meskos ku fe ta basá, no riba nos sirkunstansia, sino mas bien riba e bèrdat tokante Dios, asina alabansa ta algu ku nos ta hasi, no pasobra nos ta sinti bon, sino pa motibu di e bèrdat di ken Dios ta i loke El a primintí nos. I asombrosamente, ta un fe asina ta kuminsá forma nos pensamentu, sintimentu, i sirkunstansia.

Kiko ta e bèrdat tokante Dios ku Pablo ta identifiká den e pasashi di awe bèrdat ku ta kapasitá nos pa ta kontentu, asta den prizon? Skirbi un lista kortiku di loke bo sa ku ta e bèrdat tokante Dios. Pasa riba e lista i alabá Dios pa kada punto. Kon esaki ta kambia e manera ku bo ta sinti tokante i ta mira bo sirkunstansianan?

102