Les di sabbatskol kuartaal 3, aña 2022, Titula: Den e krisol ku Kristu

Les 9: Un Bida di Alabansa

Un Testigu Ku ta Konvensé

Lesa pa e siman aki:

Fil. 4:4-7, , Hos. 5:13- 6:20, Salmo 145, Echonan 16:16-34, 2 Kron. 20:1-30.

TEKSTO PRINSIPAL:

"Keda semper kontentu den Señor! Mi ta ripití: Keda kontentu!" (Filipensenan 4:4).

djarason, 24-08-2022

I Den e buki di Echonan, alabansa tabatin un efekto asombroso riba esnan ku tabata tend'é. Lesa Echonan 16:16-34. Despues ku nan a sker nan paña kita for di nan kurpa i a bati nan duru, nan a tira Pablo i Silas den prizón. No tabatin niun hende einan pa pone ungwento riba nan lomba ku tabata mal kòrtá i gólpiá. Den gran doló físiko i ku nan pianan den blóki, nan a pone nan den e skuridat di e parti di mas paden di prizón. Pero miéntras e otro prizoneronan tabata sinta skucha, Pablo i Silas a kuminsá hasi orashon i kanta.

Despues di e teremoto, i despues ku e wardadó di prezu a deskubrí ku ni Pablo ni Silas ni niun di e otro prizoneronan a skapa, "temblando el a kai dilanti Pablo i Silas. Despues el a hiba nan pafó i puntra: 'Shonnan, kiko mi mester hasi pa haña salbashon?' "(Echonan 16:29, 30).

Di kon e evento akí a pone e wardadó di prezu enfoká riba su propio nesesidat di salbashon? Ki ròl bo ta kere ku e orashon i kantikanan di Pablo i Silas a hunga den e echo ku e prizoneronan no a kore bai, i den e kombershon di e hòmber akí i henter su famia?

Ta asombroso pensa ku nos alabansa por transformá e destino eterno di esnan rònt di nos. Si Pablo i Silas a sinta den sukú murmurá i keha manera prizoneronan ta hasi hopi biaha, bo ta kere ku kualke hende lo a salba e anochi ei?

Nos no sa kiko a sosodé ku e wardadó di prezu i su famia mas despues, pero bo por imaginá bo ku nan ta lesa e palabranan ku Pablo a skirbi despues for di un otro prizón na Roma: "Pasobra boso no a haña solamente e privilegio di kere den Kristu, pero tambe di sufri p'E. Boso ta pasando den e mesun lucha ku boso a mira ami pasa aden i ku awor boso ta tende ku mi ta pasando aden ketu bai" (Fil. 1:29, 30). Si nan a lesa esaki i a reflekshoná riba kon Pablo su sufrimentu a trese goso pa nan, siguramente e mester a trese un kantika riba nan kurason i un desafio fresku pa keda fiel, no ta importá e preis.

Ken bo ta kere lo por tabata influensiá pa Dios a traves di un kantika di alabansa ku lo por a bin for di bo kurason? Hasi un esfuerso koordiná pa ta mas habrí i entusiasmá den bo alabansa na Dios rondó di otro. Bo no sa e efekto positivo ku e lo por tin.

105