Les di Sabbatskol

djadumingu, 28-05-2023

Den konteksto di e último dianan, Hesus a ekspresá un spiertamentu poderoso: "Lo lanta hende ku ta pretendé di ta e Mesias i di ta profeta; nan lo mustra señal i nan lo hasi milager pa asina desviá, si ta posibel, asta e eskohidonan di Dios" (Marko 13:22). Ken ta e "eskohidonan"? Mas despues E ta bisa: "Despues ku un tròmpet grandi resoná, lo E manda su angelnan reuní su eskohidonan for di e kuater skinanan di mundu, for di un ekstremo di mundu te e otro ekstremo" (Mat. 24:31). Un tiki spantoso, no ta bèrdat, ora e engaño den e último dianan lo ta asina grandi ku asta esnan fiel lo ta den peliger di ta engañá?.

Lesa Revelashon 12:9. Ken Satanas ta gaña? Kon nos ta komprendé e palabranan akí?

Opviamente, Dios ta bai tin algun hende fiel den e último dianan, manera E tabatin a lo largu di tur e siglonan. Sin embargo, e fraseologia akinan ta mustra presis kon ekstenso Satanas su engaño ta realmente.

Lesa Proverbionan 14:12. Ki spiertamentu poderoso ta presentá akinan?

Hopi biaha ta bisa hende pa sigui nan propio konsenshi pa asina determiná pa nan mes loke ta korekto òf robes, bon òf malu, i e ora ei biba di akuerdo ku esei. Pero Skritura ta bisa ku nos tur ta pekadó, tur ta korupto (Yer. 17:9, , Rom. 3:9-18), i asina, konfia nos propio sintimentunan ta kasi un manera garantisá pa, trempan òf lat, tin e robes i asta hasié robes. A traves di siglonan hendenan totalmente konvensí di e eksaktitut di nan kousa, a kometé un kantidat di maldat. Es desir, nan a sigui e "kaminda ku ta parse korekto" pa nan.

En kambio, nos mester profundisá nos mes den e Palabra di Dios, i pa medio di Su Palabra, miéntras nos ta someté na Spiritu Santu, distinguí bèrdat for di eror, korekto for di robes, bon for di malu. Si laga nos pa nos mes kuenta, òf asta den nos propio sentido, nos por bira víktima fásil di e engañonan di Satanas.

Pensa bon riba ehèmpel di hendenan ku a aktua basá riba loke nan mes a kere ku tabata korekto òf asta loke nan a kere ku tabata boluntat di Dios, pero a hasi kosnan malu. Kiko nos por siña for di e eventonan trágiko aki?

111