Les di Sabbatskol

djamars, 30-05-2023

Adorashon di solo tabata prominente na Egipto, Asiria, i siguramente Babilonia. Den su buki The Worship of Nature, James G. Frazer ta hasi e opservashon akí: "Na Babilonia antiguo nan tabata adorá solo for di antigwedat pre históriko."-Tomo 1, p. 529. E por parse sorprendente, pero tin biaha adorashon di solo babilóniko tabata influensiá e adorashon di Dios su pueblo den Testament Bieu.

Lesa Ezekiel 8:16 i 2 Reinan 23:5, 11. Kiko e profetanan a skirbi tokante di e influensia di adorashon di solo na Israel i Huda? (Wak tambe Rom. 1:25.)

Profeta Ezekiel, un kontemporáneo di Daniel, a deskribí algun di e pueblo di Dios ku lomba den direkshon di e tèmpel di Dios, adorando solo den direkshon pariba. Na lugá di adorá e Kreador di solo, nan tabata adorá e solo en kambio.

Den Revelashon 17 Huan ta deskribí un tempu ora e prinsipionan di Babilonia, inkluyendo adorashon di solo, lo a drenta den e iglesia kristian durante un era di kompromiso. E kombershon kasual di Constantino, den e promé parti di e di kuater siglo, a kousa gran goso den Imperio Romano. Constantino tabatin un afinidat fuerte pa adorashon di solo. Edward Gibbon, e historiadó renombrá, ta skirbi: "Tabata selebrá Solo komo e guia i protektor invensibel di Constantino."-The History of the Decline and Fall of the Roman Empire, kapítulo 20. Na aña 321 despues di Kristu, Constantino a pasa tambe e promé "lei di djadumingu". E anunsio tabata deklará: "Riba e dia venerabel di Solo laga e magistradonan i e hendenan ku ta biba den e siudatnan sosegá, i laga tur tayer ta será."-Edict of Constantine, d.K. 321. Esaki no tabata un lei ku a imponé wardamentu di djadumingu pa tur e súpditonan di Constantino, pero el a fortifiká e wardamentu di djadumingu den mente di e poblashon romano.

Tabata den e dékadanan ku a sigui ku emperador- i papanan a sigui, pa medio di dekretonan di estado i konsehonan di iglesia, establesé djadumingu komo e dia singular di adorashon, loke e ta awendia tambe pa mayoria di kristian. Ki un ehèmpel poderoso di e bèrdat duru ku djis pasobra mayoria di hende ta kere den un kos, òf ta praktik'é, no ta hasié korekto.

Wak rònt kon komun adorashon di djadumingu ta den iglesianan kristian. Kiko e echo akí mester siña nos tokante kon penetrante e engañonan di Satanas ta? Atrobe, manera ku estado di morto, kiko ta nos úniko salbaguadia?

113