Les di Sabbatskol

djaweps, 01-06-2023

E muhé na kòrá kimá i püs, koriendo riba e bestia kubrí ku skarlata, a pasa su kopa di biña rònt, i e mundu ta burachi ku e doktrinanan falsu di Babilonia. Papiando di e "biña di Babilonia", Ellen G. White ta hasi e komentario kla akí: "Kiko e biña ei ta? Su doktrinanan falsu. El a duna mundu un Sabat falsu na lugá di e Sabat di e di kuater mandamentu, i a ripití e falsedat ku Satanas a bisa Eva promé den Eden,-inmortalidat natural di e alma."-Ellen G. White, Review and Herald, 6 di desember 1892. E siñansanan eróneo akí a gaña miónes. Komo resultado, Dios ta dunando Su pueblo, ketu bai ankrá den eror, un último apelashon di último dia.

Lesa Revelashon 18:4, 5. Kiko ta Dios su apelashon na multitutnan ku ainda ta den organisashonnan religioso kaí?

Manera nos a mira kaba (pero ta bale la pena ripití), hopi di esnan ku ta pertenesé na Dios su pueblo ta den organisashonnan religioso ku a komprometé siñansanan bíbliko. Nan no ta komprendé e bèrdatnan di Skritura. Dios su apelashon amoroso ta direkt: "Sali fo'i dje, mi pueblo! Sino boso ta bira kómplise di su pikánan i e plaganan ku ta bini riba dje, lo afektá boso tambe" (Rev. 18:4).

Lesa 1 Huan 3:4 i kompar'é ku Romanonan 14:23. Kon Beibel ta definí piká? Kon e pasashinan di Beibel akí ta harmonisá?

Piká ta transgreshon òf kibramentu die lei di Dios. E úniko manera ku kualke hende por obedesé e lei ta pa medio di fe den e poder di e Kristu bibu. Nos ta sernan humano débil, frágil, basilante, pekaminoso. Pa medio di fe, ora nos aseptá Kristu, Su grasia ta ekspiá pa nos pasado i ta empoderá nos presente. E ta duna nos "grasia i apostolado pa trese obediensia" (Rom. 1:5, , Beibel Santu). Shelu su apelashon na Su pueblo den iglesianan ku no ta respetá i obedesé e lei di Dios ta pa sali afó pa medio di fe. Su apelashon na atventistanan den kongregashonnan ku ta warda Sabat ta pa bandoná tur intento humano egoséntriko na obediensia i biba bidanan santu pa medio di fe den e grasia di Kristu, ku ta libra nos di kondenashon di piká i domínio di piká. I meskos ku Israel su fieldat na e lei (Deut. 4:6) lo tabata un testimonio poderoso pa mundu, nos fieldat tambe por ta un testimonio poderoso i por yuda guia hende for di Babilonia.

115