les di Sabbatskol
otro idioma
Les di sabbatskol kuartaal 2, aña 2023, Titula: E TRES MENSAHENAN KÓSMIKO
Les 3: E Evangelio Eterno
UN BUKI DI SPERANSA YENÁ KU GRASIA
Lesa pa e siman aki:
Rev. 14:6-12; 1 Kor. 15:1-4; Rom.3:24-26; l Pe. 1:18-20; Mat. 28:19, 20; Echonan 1:8.
TEKSTO PRINSIPAL:
"E ora ei mi a mira un angel ku ta bula altu den laria. E mester a trese pa e habitantenan di mundu, pa kada rasa i tribu, pa kada idioma i pueblo, un mensahe, un bon notisia ku ta keda semper na vigor" (Revelashon 14:6).
djadumingu, 09-04-2023
Ora mayoria hende pensa riba e último buki di Beibel, nan no ta pensa riba e grasia di Dios. Ora nan konsiderá Dios su mensahe di último dia, nan pensamentunan ta bai hopi biaha inmediatamente riba bestianan spantoso, símbolonan místiko i imágennan straño. E buki di Revelashon ta spanta mes tantu hende ku e ta trankilisá, loke ta desafortuná, pasobra e ta, realmente, saturá ku grasia i yená ku speransa. Es desir, asta meimei di e bestianan spantoso i spiertamentunan di persekushon i e tempunan difísil nos dilanti, Dios ainda ta duna nos motibu pa alegrá nos mes den Su salbashon.
Lesa Revelashon 1:1-3 i Revelashon 14:6. Kon e versíkulonan akí huntu ta konta nos tokante di, no solamente e buki di Revelashon, sino tambe tokante di e "evangelio eterno"?
Revelashon ta trata di Hesus. E ta Su mensahe na Su pueblo i ta spesialmente aplikabel na Su iglesia den e último dianan. E ta un mensahe yená ku grasia di nos speransa di tempu di fin. A lo largu di e buki, ta deskribí Kristu komo e Lamchi matá, i ta primintí un bendishon na esnan ku lesa, komprendé i aktua riba e berdatnan revelá.
Di akuerdo ku Revelashon 1:5, 6, , Hesus ta esun kende a "stima nos i a drama su sanger pa liberá nos di nos piká. El a establesé un reino, kaminda nos komo saserdote ta sirbi su Dios i Tata". Den Kristu nos ta pordoná. Grasia ta pordoná nos pasado, ta empoderá nos presente, i ta proveé speransa pa nos futuro. Es desir, den Kristu nos ta librá di e kastigu i poder di piká, i un dia serka nos lo ta librá di e presensia di piká. Esaki ta e mensahe di e último buki di Beibel, Revelashon.
I e ta tambe un mensahe urgente, promé deskribí komo un angel bulando rápidamente meimei di shelu teniendo e "evangelio eterno".
E evangelio? Salbashon pa medio di fe den Kristu? Kristu su morto ekspiatorio pa nos? E promesa di bida eterno, no pa motibu di loke nos por hasi, ma pa motibu di loke Kristu a hasi pa nos? Tur esaki ta na kuminsamentu di e mensahenan di e tres angelnan? Eksaktamente!
Nada straño, anto, ku nan ta mensahenan yená ku grasia, yen di speransa i promesa pa nos komo sernan kibrá i sufriendo.
Aunke ta fásil pa enfoká riba e bestia i spièrtamentunan di e último dianan, manera deskribí den Revelashon, kon nos por siña balaná tur esakinan ku loke ta, indudablemente, e mensahe di mas importante di Revelashon: Kristu su morto apnegá na nos fabor?
32