les di Sabbatskol
otro idioma
Les di sabbatskol kuartaal 2, aña 2023, Titula: E TRES MENSAHENAN KÓSMIKO
Les 3: E Evangelio Eterno
Un storia di grasia
Lesa pa e siman aki:
Rev. 14:6-12; 1 Kor. 15:1-4; Rom.3:24-26; l Pe. 1:18-20; Mat. 28:19, 20; Echonan 1:8.
TEKSTO PRINSIPAL:
"E ora ei mi a mira un angel ku ta bula altu den laria. E mester a trese pa e habitantenan di mundu, pa kada rasa i tribu, pa kada idioma i pueblo, un mensahe, un bon notisia ku ta keda semper na vigor" (Revelashon 14:6).
djamars, 11-04-2023
E mensahenan di e tres angelnan ta un storia di grasia. Nan ta e storia di un Salbador su amor inmenso un storia di Hesus kende ta stima nos asina tantu ku E lo a, mas bien, eksperensiá fiernu mes si tin un di nos pèrdí. Nan ta e storia di un amor sin límite, inkonsebibel, inkomprendibel, inmortal, interminabel i infinito.
Dios nunka ta haña sorpresa. E no ta mará na e bientunan kambiabel di eskoho di humanidat. Manera nos a mira kaba, Su plan pa libra nos for di e domínio di piká no tabata algun pensamentu sekundario despues ku piká a lanta su kabes mahos. E drama di piká no a kue Dios di sorpresa.
Lesa Revelashon 13:8 i 1 Pedro 1:18-20. Kiko e versíkulonan akí ta siña nos tokante di e plan di salbashon?
E frase "evangelio eterno" den Revelashon 14:6 ta papia di pasado, presente i futuro. Ora Dios a krea humanidat ku kapasidat di hasi eskoho moral, El a antisipá ku nan lo a hasi eskohonan robes. Unabes Su kriaturanan tabatin kapasidat pa skohe, nan tabatin kapasidat pa rebeldiá kontra di Su naturalesa amoroso. E úniko manera pa evitá e realidat akí lo tabata pa krea sernan robòt, kontrolá i manipulá pa algun plan kósmiko divino. Lealtat fòrsá ta kontrali na e naturalesa mes di Dios. Amor ta rekerí eskoho, i unabes a duna ser humano poder di eskoho, e posibilidat di hasi eskoho robes ta eksistí. P'esei, Dios a konsebí e plan di salbashon den Su mente promé ku e rebelion di nos promé mayornan den Eden.
"E plan pa nos redenshon no tabata un pensamentu sekundario, un plan formulá despues di e kaida di Adam. E tabata revelashon di 'su plan ku pa siglo El a tene skondí'. Romanonan 16:25. E tabata un despliegue di e prinsipionan ku for di siglonan eterno tabata e fundeshi di e trono di Dios."-Ellen G. White, The Desire of Ages, p. 22.
E "evangelio eterno" ta papia no solamente di pasado i presente e ta e base di un futuro ku speransa. E ta papia di biba eternamente huntu ku Esun kende su kurason ta anhelá pa ta ku nos pa semper.
Lesa Efesionan 1:4. Pensa riba kiko ta niflká ku, asta promé ku e "fundashon di mundu", a "skohe" bo den Kristu pa bo tin salbashon den djE. Di kon bo mester haña e berdat akí asina alentador?
34