Les di Sabbatskol

djabierne, 21-04-2023

Pensa riba e palabranan maravioso di Pablo den Hebreonan 7:25, , ku, papiando tokante Hesus komo nos Sumosaserdote, ta bisa ku "pa semper E por salba esnan ku ta aserká Dios pa medio di djE". Salba pa semper. E palabra griego pa "pa semper" ta nifiká "pleno, kompleto, total". Ta Hesus ta salba nos; nos trabou ta pa someté na djE, reklamando Su viktoria pa nos. Nos konfiansa mester ta den djE, no den nos mes.

"Nos por resumí e forsa di e ekspreshon 'teme Dios' den Revelashon komo Dios su último yamada na humanidat pa skohe E komo nan Dios glorioso i mahestuoso, (...) kende lo ta viktorioso riba e forsanan di maldat ku ta opon'E i Su plan pa rasa humano (konsultá [Rev.] 14:9-11). E temor akí no ta manifestá su mes, a lo ménos no pa awor (konsultá [Rev.] 6:14-17), den teror i temblamentu, sino den sumishon gososo i amoroso na e lei di Dios i na Su adorashon eksklusivo. No mester rekonosé niun otro poder komo digno di un deboshon i lealtat asina. De echo, no tin otro opshon, pasobra loke ta mustra su mes na horizonte di e konflikto kósmiko komo posibilidat ta akshon di podernan demoniako destiná pa ekstinshon (Revelashon 16:13, 14; 17:14; 20:11-15). Pa e motibu ei, temor di Señor ta un invitashon divino positivo (...) pa tuma Dios su banda den e konflikto kósmiko pa asina para dilanti di Su presensia di mas glorioso, yená ku goso den kompañerismo eterno kunE ([Rev.] 21:3-4; [Rev.] 22:3-5)."-Ángel Manuel Rodríguez, "The Closing of the Cosmic Conflíct: Role of the Three Angels' Messages", p. 27.

PREGUNTA PA DISKUSHON:
1. Pensa riba e poder inkreibel di Dios, Esun kende a krea i ta sostené henter e kòsmòs. Apénas nos por kapta e idea di e kòsmòs; kon anto nos por sikiera kuminsá kapta su Kreador? Pensa riba kon muchu mas grandi i mas enorme i mas poderoso E ta ku nos. I e Dios akí lo husga nos un dia? Kon e echonan akí ta yuda nos komprendé e idea di e "temor di Dios" i loke e ta nifiká?
2. Kon nos por evitá legalismo ora nos ta diskutí e konseptonan bíbliko di santidat, vensementu i viktoria? Di kon nos mester komprendé semper ku tabata e viktoria di Kristu pa nos, na e krus, esei so ta keda e fundeshi di nos speransa di salbashon, no ta importá nos viktorianan (òf asta fayonan) akinan awor?
3. Di kon, asta ku tur e promesanan di viktoria riba piká, hopi biaha nos ta haña nos mes ta faya i no ta biba na e normanan di hustisia ku Hesus Mes a modelá pa nos i ta primintí ku por ta di nos tambe? Ki eror nos ta kometiendo di no permití Dios hasi e obra den nos ku El a primintí?

48