Les di Sabbatskol

djarason, 19-04-2023

Un estudio di uso di e frase den Testament Bieu "duna gloria na Dios" (Rev. 147, Beibel Santu) ta mustra ku, interesante sufisiente, hopi biaha (ma no solamente) e ta aparesé den konteksto di huisio divino (Hos. 7:19; 1 Sam. 6:5; Yer. 13:15, 16; Mal. 2:2), meskos ku e ta hasi den e mensahe di e promé angel tambe (Rev. 14:7). Ta mira e idea akí tambe den Revelashon 19:1, 2-"Alabá sea Señor! Salbashon, gloria i poder ta pertenesé na nos Dios! Hustu i konfiabel su huisionan ta".

Lesa 1 Korintionan 3:16, 17; 1 Korintionan 6:19, 20; i 1 Korintionan 10:31. Kon e pasashinan akí ta yuda nos komprendé un manera ku nos por glorifiká Dios?

Di akuerdo ku apòstel Pablo, nos kurpa ta un santuario, e lugá di biba di e Spiritu di Dios, un tempel hasí santu pa e presensia di Dios. Skrituranan ta duna nos un yamada kla pa glorifiká Dios den tur aspekto di nos bida. Ora Dios ta e sentro di nos bida, nos úniko deseo ta pa dun'E gloria, sea ta ku nos dieta, nos bestuario, nos entretenimentu, òf nos interakshon ku otronan. Nos ta duna gloria na Dios ora nos ta revelá Su karakter di amor na e mundu a traves di nos kompromiso pa hasi Su boluntat. Esaki ta mas importante ainda den lus di e huisio di tempu di fin di tera.

Lesa Romanonan 12:1, 2. Ki apelashon apostel Pablo ta hasi enkuanto di e totalidat di nos eskohonan di bida?

E palabra griego den Testament Nobo pa kurpa den e pasashi akí ta somata, ku ta mihó tradusí komo e totalidat kolektivo di ken bo ta-kurpa, mente i emoshon. E tradukshon Phillips di Beibel ta tradusí e ekspreshon "sirbishi rasonabel" komo un "akto di adorashon inteligente". Ku otro palabra, ora bo hasi un kompromiso total pa "teme Dios" i "glorifik'E" den tur loke bo ta hasi, dunando'E bo mente, kurpa, i emoshon, esaki ta un akto di adorashon inteligente. I tambe, den lus di e huisio di Dios, konsiderá pa obedesé ta, enberdat, un bon idea.

Pensa riba loke bo ta hasi ku bo kurpa. Kiko bo por hasi pa sigurá ku bo ta, realmente, glorifikando Dios kuné?

46