Les di Sabbatskol

djaweps, 11-05-2023

Maske kuantu nos por i ta maraviá i adorá Señor komo nos Kreador, tin mas kos ta bini kuné. Manera nos a mira kaba, pero digno di wak atrobe, ta e idea ku nos Kreador ta tambe nos Redentor. E Dios kende a krea nos ta e mesun Dios kende a redimí nos. E Dios kende a bisa:"Laga Nos traha hende segun Nos imágen, konforme Nos semehansa" (Gén. 1:26, , Beibel Santu), ta e mesun ku, riba e krus, a grita: "Eli, Eli, lama sabagtani?" es desir, "Mi Dios, mi Dios, pakiko Bo abandoná Mi?" (Mat. 27:46). Papiando di e motibu pa teme Dios òf mas ainda, pa dun'E gloria i pa ador'E tambe!

Kon nos por, komo sernan humano kaí, respondé adekuadamente riba un bèrdat asina asombroso manera esaki? Kiko nos por duna posiblemente komo kontesta? A bisa nos, den e mensahe di e promé angel, kiko hasi: "Tene respet di Dios i dun'É honor, pasobra e ora di su huisio a yega. Adorá Esun ku a traha shelu i tera i laman i bròn di awa" (Rev. 14:7).

Lesa Huan 19:16-30, , Huan su relato di Hesus riba krus. Segun ku bo ta les'é, pensa riba e tekstonan di Beibel ku nos a wak tokante di Hesus komo Kreador, komo Esun pa medio di ken "Dios a krea tur kos den shelu i riba tera, loke ta visibel i invisibel, inkluso e podernan spiritual, potensianan, outoridatnan i gobernantenan. Dios a krea tur kos pa medio di djE i tur kos ta dirigí riba djE" (Kol. 1:16). Kon nos mester respondé riba e ekspreshon asombroso akí di e amor di Dios?

E mensahe di e promé angel pa adorá e Kreador a bini despues di e krus, despues ku a bira konosí na e universo ku ta mirando i na e siguidónan di Kristu, Esun kende a "traha shelu i tera i laman i fuentenan di awa" ta e Mesun ku, aunke siendo Dios, a "bira igual na hende. I ora El a aparesé komo hende, El a humiliá su mes i a bira obedesidu te na morto, sí, morto na krus" (Fil. 2:7, 8). Ki un espektákulo maravioso esei mester tabata pa esnan ku tabata konosé Hesus promé ku El a bini na tera komo un ser humano. Nada straño ku sernan selestial tambe ta ador'E. Pa loke ta trata nos, redimí pa Su sanger, kiko mas nos lo por hasi sino adorá nos Kreador i nos Redentor?

Di kon e idéa, den lus di e krus, di sernan humano kaí ku ta kapas di añadí kualke kos na loke Kristu a hasi riba krus, ta un idea asina herétiko? Kua dí nos obranan lo por añadí na loke e Kreador ya a hasi pa nos?

82