les di Sabbatskol

Les di sabbatskol kuartaal 2, aña 2023, Titula: E TRES MENSAHENAN KÓSMIKO

Les 9: Un Siudat Yamá Konfushon

E biña di e rabia

Lesa pa e siman aki:

Rev. 17:1, 2, 15; Rev. 18:1-4; Rev. 17:4-6; Mat. 16:18; Yer. 50:33-38; Salmo 115:4-8.

TEKSTO PRINSIPAL:

"Nan lo bringa kontra e Lamchi, ma e Lamchi, huntu ku su siguidónan fiel ku Dios a skohe i yama, lo derotá nan, pasobra e Lamchi ta e Señor di mas altu i e Rei riba tur rei" (Revelashon 17:14).

djaluna, 22-05-2023

Lesa Revelashon 17:1, 2, 15 i Revelashon 18:1-4. Kon ekstensivo e influensia di Babilonia ta?

E sistema di iglesia falsu tin un alkanse internashonal, influensiando hendenan rònt mundu ku nan engañonan. Satanas ta furioso ku lo proklamá e evangelio na tur "rasa i tribu, idioma, i pueblo" i "lo prediká e bon notisia di e reino rònt mundu", asina ku e ta usa tur engaño posíbel pa koutivá mente di "e habitantenan di mundu" (Rev. 14:6, , Mat. 24:14, , Rev. 17:2).

Revelashon 17:2 ta kontinuá ku su splikashon di e misterio di e gran Babilonia deklarando ku el a 'kometé fornikashon' ku e reinan di tera. Kiko ta fornikashon? E ta un union ilegal. Den e sistema di iglesia kaí, uni ku estado. Den e sistema berdadero di iglesia, e iglesia ta uní ku Hesu-Kristu. E iglesia kaí ta wak e lidernan polítiko di tera pa poder i outoridat. E ta buska e estado pa kumpli ku su dekretonan. Na lugá di saka su fortalesa for di Kristu komo su berdadero kabes, e ta wak estado pa sosten.

Revelashon 17:2 ta sigui ku su representashon dramátiko: "i e habitantenan di mundu a bebe nan mes burachi ku e biña di su inmoralidat". Ta usa e simbolismo di e djus puru di druif den henter Testament Nobo pa representá e sanger puru i sin mancha di Kristu, bashá pa nos salbashon riba e krus (Mat. 26:27-29). Den Lukas 22:20 Hesus ta bisa: "Esaki ta e kopa di e aliansa nobo konfirmá ku mi sanger". Ora trose e biña nobo i puru di e evangelio, i supstituí e siñansanan di e Palabra di Dios pa e siñansanan di lidernan religioso humano, e ta bira e "biña di Babilonia". (Wak Mat. 15:9.)

Nota tambe, ku Dios ta yama Su pueblo pa sali for di Babilonia. Den otro palabra, no ta importá kon korupto i malu e sistema ta, su alkanse ta asina hanchu ku e ta abarká, a lo ménos pa sierto tempu, Su fielnan, òf "Mi pueblo", (Rev. 18:4), manera E ta yama nan. Sin embargo, e tempu ta yegando ora ku Dios lo yama nan pa sali for di e sistema korupto i malu, ku ta na punto di kai pa motibu di su naturalesa korupto i malu, e "lugá di biba pa demoño" akí i e "lugá di skonde pa tur sorto di para impuru" (Rev. 18:2).

Ki ròl esnan ku ta proklamá e mensahenan di e tres angelnan tin, ku Dios ta usa nan pa yama “ Mi pueblo”, Su pueblo, pa Sali for di Babilonia?

101