les di Sabbatskol

Les di sabbatskol kuartaal 2, aña 2023, Titula: E TRES MENSAHENAN KÓSMIKO

Les 9: Un Siudat Yamá Konfushon

Un Yamada na kompromiso

Lesa pa e siman aki:

Rev. 17:1, 2, 15; Rev. 18:1-4; Rev. 17:4-6; Mat. 16:18; Yer. 50:33-38; Salmo 115:4-8.

TEKSTO PRINSIPAL:

"Nan lo bringa kontra e Lamchi, ma e Lamchi, huntu ku su siguidónan fiel ku Dios a skohe i yama, lo derotá nan, pasobra e Lamchi ta e Señor di mas altu i e Rei riba tur rei" (Revelashon 17:14).

djarason, 24-05-2023

E apelashon di Revelashon ta un yamada urgente na kompromiso, resumí den e simbolismo di e dos muhénan den Revelashon. Aunke tin biaha lo parse ku lo derotá e pueblo di Dios den e konflikto kósmiko akí entre bèrdat i eror, Dios ta primintí ku Su iglesia lo triunfá na final.

Kompará Mateo 16:18 ku Revelashon 17:14. Ki promesa Hesus a duna Su disipelnan enkuanto di Su iglesia?

Kristu ta e fundeshi sólido ku Su iglesia ta trahá riba dje. Su iglesia ta basá riba e siñansanan di Su Palabra i ta guiá pa Su Spiritu. Kontrali na esei, Babilonia, manera nos a mira, ta ankrá riba siñansa i tradishon trahá pa hende. Kualke lider religioso ku ta supstituí opinion òf tradishon humano na lugá di, òf riba, e boluntat revelá di Dios den e Skrituranan, ta simplemente fomentando konfushon babilóniko.

Den e dianan di Babilonia antiguo, iglesia i estado tabata un i e mesun kos. Ora rei Nebukadnesar tabata sinta den su tèmpel riba su trono real, e tabata papia supuestamente pa e diosnan. Na un okashon, komo un akto di desafio na e Dios berdadero, e rei babilóniko a pasa un dekreto universal imponiendo adorashon i a ordená tur su súpditonan pa buig pa su dekreto, un símbolo poderoso di loke Dios su pueblo fiel, ku ta nenga di adorá e imágen falsu, lo enfrentá den e último dianan. (Wak Daniel 3.)

Den e último dianan di historia di tera, un sistema di iglesia i estado lo lanta, Babilonia spiritual, ku un lider spiritual reklamando di ta papia komo Dios. Lo deklará ku su palabra ta e palabra mes di Dios i su mandatonan e mandatonan di Dios. A lo largu di siglonan e pontífise romano a deklará ku nan ta para na lugá di Dios riba tera. Den su karta papal di 20 di yüni 1894, Papa Leo XIII a deklará: "Nos tin aki riba tera e lugá di Dios Todopoderoso." Ferraris Ecclesiastical Dictionary ta añadí: "Papa ta di dignidat asina grandi i asina eksaltá ku e no ta djis un hende, sino komo si fuera Dios i e vikario di Dios." Apostel Pablo ta añadí e palabranan akí eksponiendo e poder akí: "(...) ku ta lanta kontra tur loke ta karga nòmber di Dios i ta digno di adorashon, i ta alsa su mes riba nan. E ta yega asina leu ku e ta bai sinta den tèmpel di Dios i proklamá públikamente ku t'é mes ta Dios!" (2 Tes. 2:4).

Pasobra ya nos a mira ku Dios tin hendenan fiel den "Babilonia", di kon nos mester ta kuidadoso kon nos ta papia di dje, i di kon nos mester ta kuidadoso pa no husga hende komo persona, kontraliu na e sistema mes?

103