Les di sabbatskol kuartaal 1, aña 2024, Titula: E BUKI DI SALMO

Les 1: Kon Lesa Salmo

PA STUDIA I MEDITÁ:

Lesa pa e siman aki:

1 Krón. 16:7; Neh. 12:8; Salmo 25:1-5; Salmo. 33:1-3; Rom. 8:26, 27; Salmo 82:8; Salmo 121:7

TEKSTO PRINSIPAL:

"E ora ei El a bisa nan: 'Ta esaki ta e kosnan ku Mi a konta boso, tempu Mi tabata ainda huntu ku boso: Tur kos di Mi, ku ta skibí den Lei di Moises, den profetanan i den Salmonan mester bira realidat.' Na e momento ei El a habri nan mente pa nan por a komprondé Skritura" (Lukas 24:44, 45).

djabierne, 05-01-2024

E Salmonan ta konsistí di 150 salmo, ku ta agrupá den sinku buki: Buki I (Salmonan 1-41), Buki II (Salmonan 42-72), Buki III (Salmonan 73-89), Buki IV (Salmonan 90-106), i Buki V (Salmonan 107-150). E divishon di sinku buki di e Salmonan ta un tradishon hudiu primitivo ku ta kore paralelo ku e divishon di sinku buki di e Pentateuko.

E Salmo ta proveé evidensia di algun kolekshon di Salmo ku tabata eksistí kaba: e kolekshonnan koreita (Salmonan 42-49, 84, 85, 87, 88), e kolekshon asafita (Salmo 73-83), e Kantonan di Asenshon (Salmonan 120-134), i e Salmonan di Aleluya (Salmo 111-118, 146-150). Salmo 72:20 ta duna testimonio di un kolekshon mas chikitu di e Salmonan di David.

Miéntras mayoria salmo ta asosiá ku e tempu di Rei David i e promé monarkia (siglo 10 P.K.), e kolekshon di Salmo a sigui krese a lo largu di e siguiente siglonan: e monarkia dividí, e eksilio, i e período despues di e eksilio. Ta imaginabel ku e eskribanan hebreo bou di liderazgo di Esdras a kombiná e kolekshonnan mas chikitu ku tabata eksistí di salmo den un buki ora nan tabata traha riba establesé e sirbishinan di e tèmpel nobo.

E echo ku e eskribanan a konsolidá e Salmonan, no ta kita inspirashon divino for di nan. E eskribanan, meskos ku e salmistanan, tabata sirbidónan deboto di Dios, i Dios tabata dirigí nan trabou (Esdras 7:6, 10). E naturalesa divino-humano di e Salmonan ta komparabel ku e union di loke ta divino i loke ta humano den e Señor Hesus enkarná. "Pero Beibel, ku su bèrdatnan duná pa Dios, ekspresá den lenguahe humano, ta presentá un union di loke ta divino i loke ta humano. Un union asina tabata eksistí den e naturalesa di Kristu, kende tabata Yu di Dios i Yu di hende. Pues ta bèrdat di e Beibel, manera e tabata di Kristu, ku 'e Palabra a bira karni, i a biba meimei di nos.' "-Ellen G. White, The Great Controversy, p.8.

PREGUNTA PA DISKUSHON:

1. Kiko ta nifiká ku e Salmonan ta orashon i himno divino-humano? Kon e idea akí, aunke e ta difísil pa kapta, ta yuda nos mira e serkania ku Dios ke ku Su pueblo? Kon e ta revelá, na su propio manera, kon serka di humanidat, i di kada un di nos, Dios ta?

2. Den klas, papia tokante un tempu kaminda bo a haña algu den e Salmonan ku a papia direktamente na bo propio situashon. Ki konsuelo i speransa bo a haña e momento ei?

11