Les di Sabbatskol

djamars, 05-03-2024

Lesa Salmo 106. Kua evento históriko i nan lèsnan ta destaká den e salmo akí?

Tambe Salmo 106 ta resumí e eventonan prinsipal den historia di Israel, inkluyendo e Eksodo, estadia den desierto, i bida na Kanaan. E ta enfatisá e pikánan horibel di e tatanan ku a kulminá den e generashon ku tabata hibá den eksilio. Pues, kasi seguramente a skirbi e salmo ora e nashon tabata na Babilonia, òf despues ku nan a regresá kas, i e salmista, inspirá pa Spiritu Santu, a bolbe konta e insidentenan históriko akí pa e pueblo di Dios i e lèsnan ku e pueblo mester a siña for di nan.

E salmo akí, meskos ku e otronan, ta mustra na e fieldat di Dios na Su pakto di grasia, ku El a salba Su pueblo kuné den pasado (Salmo 106:45). E ta ekspresá speransa ku Dios lo bolbe mustra fabor na Su pueblo repentí i reuní nan for di meimei di e nashonnan (Salmo 106:47, , Beibel Santu). E súplika pa liberashon presente no ta un ilushon, sino un orashon di fe basá riba e siguransa di e liberashonnan anterior di Dios (Salmo 106:1-3) i e karakter infalibel di Dios su fieldat na Su aliansa ku Su pueblo.

E rekuerdo di Israel su frakasonan históriko den Salmo 106 ta un parti integral di e pueblo su konfeshon di nan pikánan i rekonosementu ku nan no ta mihó ku nan antepasadonan. E generashon presente ta atmití ku e ta mas pió ainda ku su antepasadonan, pasobra e tabata konosé e konsekuensianan di e inikidatnan di e generashonnan anterior i kon Dios a ehersé Su gran pasenshi i grasia pa salba nan, aunke deliberadamente nan a kana den kamindanan malbado den pasado. Si esaki tabata bèrdat pa nan, pensa riba kuantu mas pa nos, awe, ku tin e revelashon di Dios su karakter i grasia salbador manera ta revelá den Hesus i e krus.

E bon notisia di Salmo 106 ta ku e amor firme di Dios ta prevalesé semper riba e pikánan di hende (Salmo106:8-10, 30, 43-46). E ròl klave di Moises i Pinhas den desviá e rabia di Dios ta mustra na e nifikashon di Kristu su interseshon na fabor di kreyente. Solamente eksperensia personal di e grasia di Dios por transformá un storia di pasado den nos storia.

Salmo 106:13 ta bisa: "Ma nan a lubidá su obranan mesora i no ker a warda pa tende su plannan". Di kon ta asina fásil pa nos hasi esei den nos mes bida tambe?

109