Les di sabbatskol kuartaal 1, aña 2024, Titula: E BUKI DI SALMO

Les 10: Lesnan di Pasado

PA STUDIA I MEDITÁ:

Lesa pa e siman aki:

Salmo 78; Salmo 105; Gal. 3:29; Salmo 106; Salmo 80; Num. 6:22-27; Salmo 135.

TEKSTO PRINSIPAL:

"Loke nos a tende i siña, loke nos grandinan a konta nos nos no ke tene sekreto pa nan yunan, sino konta e generashon benidero: esta gloria di SEÑOR, su poder, i e kosnan milagroso k'El a hasi" (Salmo 78:3, 4).

djabierne, 08-03-2024

Lesa Echonan 7 i Hebreonan 11. Kiko Tèstamènt Nobo ta bisa ta e meta final di Dios su guia soberano di Su pueblo den historia?

E Salmonan históriko ta un testimonio poderoso na e fieldat di Dios na Su pueblo. Kada evento den historia di e pueblo di Dios tabata un paso providensial ku ta hiba na e kumplimentu final di e promesa divino di e Salbador di mundu den persona di Hesus di Názaret. Asta e pruebanan, ku hopi biaha tabata laga e pueblo di Dios babuká i pone nan pensa ku Dios a bandoná nan, tabata bou di e kontrol soberano di Dios i parti di Su providensia, pasobra Dios ta e Señor supremo di historia. E salmista ábilmente ta presentá e bèrdat ku asta e infidelidat di e pueblo no por prevení Dios di mantené fe den Su pueblo i kumpli ku Su promesanan. Sin embargo, e individuonan i gruponan ku no a repentí a keda ekskluí di e bendishonnan di pakto, i nan final notorio ta sirbi komo un spiertamentu duradero di kon bida sin òf opuesto na Dios ta destruí hende.

E Salmonan ta enkurashá e yunan di Dios den tur tempu pa spera riba Señor i permanesé fiel na djE."Nos no tin nada di teme pa futuro, eksepto si nos lubidá e manera ku Señor a guia nos, i Su siñansa den nos historia di pasado."-Ellen G. White, Life Sketches of Ellen G. White, p. 196.

Pa e pueblo di Dios sigui padilanti sin temor, nan mester konosé e echonan di nan historia. Ellen G. White ta konsehá kreyentenan pa lesa Salmo 105 i 106"por lo ménos un biaha tur siman."-Testimonies to Ministers and Gospel Workers, p. 98. E historia di e pueblo di Dios ta demostrá ku niun promesa ku Dios a hasi den Su Palabra lo keda sin kumpli. Esaki ta inkluí tantu promesa divino di kuido individual presente komo futuro promesanan di e regreso di Kristu, ku lo establesé e reino di hustisia i pas di Dios riba e tera nobo.

PREGUNTA PA DISKUSHON:

1. Kua ta e bendishonnan di kòrda Dios su guia fiel di Su pueblo den historia? Kua ta e konsekuensianan di lubidá òf ignorá e lèsnan di pasado? Kon nos por apliká e mesun prinsipio ei na nos, komo un iglesia yamá pa hasi e mesun kos ku Israel antiguo tabata yamá pa hasi?

2. Kon e Salmonan ta enkurashá nos pa rekonosé e kuido providensial di Dios den nos bida i pa ehersé pasenshi i konfiansa den e kamindanan soberano di Dios, asta ora no ta fásil pa komprendé di kon kosnan ta sosodiendo manera nan ta sosodé?

3. Kon nos por hasi e estudio di e historia di Dios su pueblo mas prominente den nos servisionan di adorashon personal i kolektivo? Kon nos por ta mas intenshonal ora nos ta konta nos yunan tokante e historia mas resien di e pueblo di Dios?

112