Les di sabbatskol kuartaal 1, aña 2024, Titula: E BUKI DI SALMO

Les 12: Adorashon Ku No ta Kaba Nunka

PA STUDIA I MEDITÁ:

Lesa pa e siman aki:

Salmo134; Isa. 42:10-12; Rev. 14:3; Salmo 15; Salmo 101-3; Salmo 96; Rev. 14:6-12; Huan 4:23, 24.

TEKSTO PRINSIPAL:

"Mi ke kanta pa SEÑOR henter mi bida, kanta alabá mi Dios tanten ku mi tin bida i rosea" (Salmo 104:33).

djabierne, 22-03-2024

Lesa Ellen G. White, "How to Pray," p. 39-42, den A Call to Stand Apart.

Sentral na adorashon tabatin e nesesidat pa arepentimentu, arepentimentu berdadero: "Arepentimentu ta inkluí tristesa pa piká i un biramentu bèk for di dje. Nos lo no renunsiá piká a ménos ku nos mira su pekaminosidat; te ora nos bira bai for di dje di kurason, lo no tin un kambio real den nos bida.

"Tin hopi hende ku ta faya di komprendé e berdadero naturalesa di arepentimentu. Multitutnan ta tristu ku nan a peka i asta ta hasi un reforma eksterno pasobra nan tin miedu ku nan mal komportashon lo trese sufrimentu riba nan mes. Pero esaki no ta arepentimentu den sentido bíbliko. Nan ta lamentá e sufrimentu mas bien ku e piká. Asina e fèrdrit di Esou tabata ora el a mira ku el a pèrdé e derecho di yu mayó pa semper. Bileam, paralisá pa e angel pará riba su kaminda ku spada saká, a rekonosé su kulpa pa e no pèrdé su bida; pero no tabatin niun arepentimentu outéntiko pa piká, niun kombershon di propósito, niun repudio di maldat. Hudas Iskariote, despues di e traishoná su Señor, a sklama: 'Mi a entregá un hòmber inosente na morto; mi a hasi piká.' Mateo 27:4."-Ellen G. White, Steps to Christ, p. 22, 23.

"Aunke Dios no ta biba den tèmpelnan trahá ku man, tòg E ta honra e reunionnan di Su pueblo ku Su presensia. El a primintí ku ora nan bini huntu pa busk'E, pa rekonosé nan pikánan, i pa resa un pa otro, E lo reuní ku nan pa medio di Su Spiritu. Pero esnan ku reuní pa ador'E mester pone tur kos malu un banda. A ménos ku nan ador'E den spiritu i bèrdat i den e beyesa di santidat, nan binimentu huntu lo ta en bano. Di esnan asina Señor ta deklará:'E pueblo akí (...) ta alabá mi ku nan boka so, ma den nan kurason nan ta leu fo'i Mi.' Mateo 15:8, 9. Esnan ku ta adorá Dios mester ador'E 'den spiritu i bèrdat. Pasobra Tata ta buska hende asina pa ador'É.' Huan 4:23."-Ellen G. White, Prophets and Kings, p. 50.

PREGUNTA PA DISKUSHON:

1.  Kua ta e adoradó su ofrenda di mas grandi na Dios (Salmo. 40:6-10; Rom. 12:1, 2)?

2. Kon adorashon individual i komunitario ta relashoná ku otro? Di kon nos mester di tur dos realmente? Kon kada un ta mehorá e otro?

3. Hopi hende ta komprendé ku adorashon ta relashoná solamente ku orashon, kantamentu di himno, i estudio di Beibel i literatura spiritual. Miéntras e aktividatnan akí ta esensial pa adorashon, adorashon ta limitá na nan? Duna algun ehèmpel di otro forma di adorashon.

4. Ellen G. White a skirbi: "No mester mira Su servisio komo un ehersisio angustioso i ku ta hasi e kurason tristu. Mester ta un plaser pa adorá Señor i tuma parti den Su obra."-Steps to Christ, p. 103. Kon adorashon di Señor por bira un plaser?

134