les di Sabbatskol

Les di sabbatskol kuartaal 1, aña 2024, Titula: E BUKI DI SALMO

Les 12: Adorashon Ku No ta Kaba Nunka

HALSA BO MANNAN DEN E SANTUARIO

Lesa pa e siman aki:

Salmo134; Isa. 42:10-12; Rev. 14:3; Salmo 15; Salmo 101-3; Salmo 96; Rev. 14:6-12; Huan 4:23, 24.

TEKSTO PRINSIPAL:

"Mi ke kanta pa SEÑOR henter mi bida, kanta alabá mi Dios tanten ku mi tin bida i rosea" (Salmo 104:33).

djadumingu, 17-03-2024

Lesa Salmo 134. Unda ta ofresé e adorashon akinan? Kua ta resultado di e adorashon di Señor?

Salmo 134 ta rekordá e bendishon pastoral di Aron den Numbernan 6:24--26 (tambe Salmo 67:1) i ta resaltá ku bendishon ta e prinsipio básiko i resultado di e relashon entre Dios i Israel. E hendenan ta bendishoná Dios den e santuario, i Dios ta bendishoná Su pueblo for di Sion. E bendishon ta ekstendé na henter bida pasobra Señor ta Kreador di shelu i tera. E menshon di Sion komo e lugá di bendishon spesial ta suprayá Señor su laso di pakto ku Su pueblo. Ta denter di e pakto di grasia akí Israel ta ehersé e privilegio di bendishoná Señor i Señor ta bendishon'E.

Lesa Salmo 18:1; Salmo 36:1; Salmo 113:1; Salmo 134:1, 2; i Salmo 135:1, 2. Kon ta deskribí e adoradónan akinan?

Hopi biaha e Salmonan ta deskribí e adoradónan komo e sirbidónan di Señor. "(...) ku ta sirbi den kas di SEÑOR despues ku anochi a sera" (Salmo 134:1) probablemente ta referí na e warda di anochi di e levitanan (1 Krón. 9:23-27) òf na e alabansa ku e levitanan tabata ofresé na Dios tantu di dia komo anochi (1 Krón. 9:33).

Pasobra e israelitanan tabata adorá e Dios invisibel, kende no por tabata representá den forma di niun imágen, e santuario tabata sirbi pa reflehá e gloria di Señor i proveé un ambiente sigur pa hendenan pekaminoso aserká nan Rei santu. Señor Mes ta inisiá e enkuentro akí i Su statuto i dekretonan ta regul'é. "Bini serka djE. E ta e piedra bibu ku hende a rechasá, pero ku Dios a skohe komo piedra balioso. Asina Dios lo usa boso manera piedra bibu den kons­ trukshon di e kas spiritual i boso lo ta saserdote santu ku ta ofresé sakrifisio spiritual ku ta agradá Dios pa medio di Hesu-Kristu" (1 Pe. 2:4, 5). Loke nos ta mira aki, den e palabranan di Pedro, ta un ekspreshon di Tèstamènt Nobo di e mesun ideanan presentá den e salmonan akí, esun di e pueblo di Dios, awor un saserdosio santu, ku ta ofresé alabansa i gradisimentu na nan Señor Hesu­Kristu, nan Kreador i Redentor, pa tur e kosnan bon ku El a hasi pa nan

Komo kreyente di Tèstamènt Nobo, nos tambe tin un ròl saserdotal den sentido ku nos ta yamá pa hiba e bon notisia di e evangelio na e mundu. Kua ta e maneranan di mas efektivo ku nos por hasi esaki?

129