les di Sabbatskol

Les di sabbatskol kuartaal 1, aña 2024, Titula: E BUKI DI SALMO

Les 12: Adorashon Ku No ta Kaba Nunka

SEÑOR, KEN POR BIBA DEN BO TABERNAKEL?

Lesa pa e siman aki:

Salmo134; Isa. 42:10-12; Rev. 14:3; Salmo 15; Salmo 101-3; Salmo 96; Rev. 14:6-12; Huan 4:23, 24.

TEKSTO PRINSIPAL:

"Mi ke kanta pa SEÑOR henter mi bida, kanta alabá mi Dios tanten ku mi tin bida i rosea" (Salmo 104:33).

djamars, 19-03-2024

Lesa Salmo 15. Ken ta e hendenan digno di adorá den presensia di Dios?

E kontesta duná den e salmo akí ta e resúmen di e rekerimentunan ya duná den e lei di Dios i e profetanan: esnan ku nan akshonnan ("obranan di hustisia") i karakter ("den su kurason") (wak Deut. 6:5, , Mik. 6:6-8) ta un refleho di Dios. E santuario tabata un lugá santu, i tur kos den dje, inkluyendo e saserdotenan, tabata konsagrá. Pues, santidat ta un rekerimentu obligatorio pa drenta den presensia di Dios. E santidat di Israel mester tabata integral, uniendo adorashon ku étika i ehersé den tur aspekto di bida. A duna e lei na e pueblo di Dios pa kapasitá nan pa kumpli ku nan potensial di mas grandi, p.e., biba komo un reino di saserdote. E saserdosio real ta inkluí un bida di santidat den presensia di Dios i hiba e bendishonnan di pakto na otro nashonnan.

Lesa Salmo 24:3-6 i Salmo 101:1-3. Kiko ta nifiká ta santu?

"Un kurason perfekto" ta e kualidat di mas grandi di e adoradó dilanti di Dios. E palabra hebreo tamim, "perfekto", ta transmití e noshon di "integridat" i "totalidat". Un mata di wendruif "perfekto" ta kompleto, intakto, i saludabel (Ezek. 15:5). Animalnan ofresé komo sakrifisio mester tabata tamim, òf sin mancha (Lev. 22:21-24). Diskurso "perfekto" ta totalmente berdadero (Job 36:4). Un "kurason perfekto" pues ta un"kurason puru" (Salmo 24:4) òf un kurason di integridat (Salmo15:2). E ta buska Dios (Salmo 24:6) i ta restourá pa medio di Dios su pordon (Salmo 51:2-10). Un bida intachabel ta sali for di rekonosementu di e grasia di Dios i Su hustisia. Grasia Divino ta inspirá i ta kapasitá e sirbidónan di Dios pa biba den temor di Señor, loke ta nifiká biba den komunion sin opstákulo ku Dios i den sumishon na Su Palabra. Un testimonio di un bida deboto i piadoso ta trese alabansa na Dios i no na e mes. Nota ku ta duna mayoria rekerimentu den Salmo 15 den términonan negativo (Salmo 15:3-5). Esaki no ta trata di gana fabor di Dios, sino tokante evitá e kosnan ku lo a separá nos for di Dios.

Kon nos por hasi eskohonan konsìente pa evitá, e kosnan ku ta pusha nos for di Dios? Kua ta algun di e kosnan ei, i kon nos por evitá, di hasi nan?

131