Les di sabbatskol kuartaal 1, aña 2024, Titula: E BUKI DI SALMO

Les 2: Siña nos Resa

PA STUDIA I MEDITÁ:

Lesa pa e siman aki:

Salmo 105:5; Kol. 3:16; Hakobo 5:13; Salmo 44; Salmo 22; Salmo 13; Salmo 60:1-5.

TEKSTO PRINSIPAL:

"Un biaha Hesus tabata resa na un sierto lugá. Ora Ela kava di resa, un di su disipelnan a bis'É:'Señor, siña nos resa, manera Huan a siña su disipelnan' "(lukas 11:1).

djabierne, 12-01-2024

Lesa Salmo 42:8 i Ellen G. White, "Poetry and Song," p. 159-168, den Education. Kon orashon i kanto ta relashoná ku otro di akuerdo ku e tekstonan inspirá akí? Ellen G. White ta deskribí e Salmonan penitente di David (por ehèmpel, Salmo 51) komo e lenguahe di su alma i orashonnan ku ta ilustrá e naturalesa di berdadero doló pa piká (wak Steps to Christ, p. 24, 25). E ta kurashá kreyentenan pa memorisá tekstonan for di e Salmonan komo e medio pa fomentá e sentido di presensia di Dios den nan bida i enfatisá Hesus su práktika di alsa Su bos ku Salmonan ora E topa ku tentashon i miedu opresivo. Tambe e ta remarká: "kuantu biaha, pa medio di palabranan di kanto santu, ta habri den e alma e fuentenan di penitensia i fe, di speransa i amor i goso! (...) En realidat, hopi kantika ta orashon."-Education, p. 162-168.

Ora nos resa i kanta e Salmonan, nos ta asumí e persistensia, perseveransia, kurashi, i speransa di e salmistanan. Nan ta kurashá nos pa sigui nos bida spiritual i ta konsolá nos ku nos no ta so. Otro hende, meskos ku nos, a pasa a traves di momentonan skur i, sin embargo, tabata triunfante, pa grasia di Dios. Na mes momento, e Salmonan ta revelá na nos e indisionan di Kristu su interseshon ferviente na nos fabor, ya ku semper E ta biba pa resa pa nos (Hebr. 7:25). Envolví e Salmonan den orashon i adorashon ta hasi e komunidat kreyente konsiente di henter e skala di eksperensia humano i ta siña e adoradónan pa envolví den vários faseta di e eksperensia ei den adorashon. E Salmonan ta orashon i kanto divino-humano. Pa e motibu ei, inkluí e Salmonan kontinuamente den adorashon ta trese e komunidat kreyente na e sentro di Dios su boluntat i grasia poderoso ku ta sana.

PREGUNTA PA DISKUSHON:

1. Di kon orashon spontáneo, sin guia, no ta e úniko forma di resa? Kon nos bida di orashon por benefisiá di e Salmonan, e orashonnan bíbliko?

2. Kon e Salmonan por enrikesé nos eksperensia di orashon komunitario? Diskutí algun manera práktiko ku bo iglesia lokal por fomentá e uso di Salmonan den su sirbishinan di adorashon.

3. Kiko e Salmonan ta revelá tokante e komplehidat di e peregrinashon humano di fe i e poder di Dios su grasia sanadó?

22