Les di Sabbatskol

djaweps, 18-01-2024

Lesa Salmo 19:7; Salmo 93:5; Salmo 119:165; Salmo 1:2, 6; Salmo 18:30; i Salmo 25:10. Kua liña komun ta kore a lo largu di nan tur?

E supremasia di Señor den mundu komo e Kreador soberano, Rei, i Hues tin implikashonnan teológiko pa e kredibilidat di Su testimonionan. E testimonionan (hebreo'edut, "dekreto", "lei") ta referí na e kurpa di lei i ordenansa ku Señor ta goberná e bida religioso i sosial di Su pueblo kuné (Eks. 32:15). Nan ta "masha sigur" (Salmo 93:5, Beibel Santu), reflehando e stabilidat i permanensia di e trono di Dios i e mundu ku Dios a krea i ta sostené (Salmo 93:1, 2). E palabra hebreo tradusí komo"sigur" (e palabra papiamentu amen ta derivá di e palabra akí) ta transmití e noshon di konfiabilidat, fieldat, i firmesa (2 Sam. 7:16, 1 Krón. 17:23). E leinan di Dios ta inkambiabel i indestruktibel.

Dios ta garantisá integridat di Su promesa- i mandatonan. E fieldat di Dios ta tantu totalmente trankilisante pa medio di garantisá e karakter inmutabel di Su gobiernu, komo totalmente eksigente pa pidi kontestanan di konfiansa i obediensia na Dios.

Na mes momento, ta deskribí e falta di hustisia den mundu di forma poétiko komo un sakudimentu di e fundeshi di tera (Salmo18:7, Isa. 24:18-21). E leinan di Dios ta instruí e pueblo den e kaminda di bida hustu ku por resistí e huisio di Dios. E hustunan, pues, lo no keda sakudí, pasobra nan ta ankrá firmemente den e lei di Dios, ku ta proveé stabilidat i seguridat, i nan kurason ta determiná (hebreo kun ta nifiká tambe "ta firme", "ta sigur") den Señor (Salmo 112:1, 6, 7). Nada ta pone esnan ku ta warda e lei di Dios trompeká (Salmo 119:165, Beibel Santu), ku ta nifiká e protekshon i guia di Dios den bida (Salmo 1:2, 3, 6).

Ta deskribí e Palabra di Dios komo e lus na pia di e salmista, i asina e ta proteh'é for di e trampanan skondí di e enemigu (Salmo 119:105, 110). Gran pas, ku esnan ku stima e lei di Dios ta gosa di dje (Salmo 119:165), opviamente no ta resultá di un ousensia total di prueba (Salmo 119:161). E ta derivá mas bien for di keda den e presensia di Dios i tin un relashon sano kunE.

Kua ta maneranan práktiko ku warda e lei-, regla- i testimonionan di Dios a yuda bo den bo bida? Na otro banda, kiko bo a sufri pa motibu di a violá nan?

32