Les di Sabbatskol

djadumingu, 21-01-2024

Lesa Salmo139:1-18. Kon e ta deskribí e poder di Dios (Salmo 139:1-6), Su presensia (Salmo 139:7-12), i Su bondat (Salmo 139:13-18) di forma poétiko? Kiko e grandesa di Dios ta bisa tokante e promesanan di Dios?

Bo a yega di ke yuda un hende pero no tabatin e medionan? Di mes manera, algun hende a purba yuda bo pero no a komprendé bo nesesidatnan. Diferente for di asta e hendenan di mas amoroso i di bon intenshon, Dios tin tantu e konosementu perfekto di nos komo di nos sirkunstansianan, i tin tambe e medionan pa yuda nos. P'esei, Su promesanan di ayudo i liberashon no ta tópikonan superfisial sino siguransanan firme.

Dios su konosementu di e salmista ta asina grandi i úniko ku asta e barika di su mama no por a skond'é for di Dios (Salmo 139:13, 15). Konosementu divino ta pertenesé na tempu (Salmo139:2), ser interior (Salmo 139:2, 4), i espasio (Salmo 139:3)-henter e eksistensia di e salmista. E konosementu maravioso di Dios ta resultado di su kreashon i relashon serkano ku hende i ta manifestá su mes den Su kuido pa nan.

E bèrdat maravioso akí ku Dios konosé nos íntimamente no mester spanta nos sino, en kambio, hala nos den e brasanan di Hesus i loke El a logra pa nos na krus. Pasobra pa medio di fe den Hesus, Dios a duna nos Su hustisia, "e hustisia di Dios" Mes (Rom. 3:5, 21, , Beibel Santu).

E presensia di Dios ta enfatisá mustrando Dios komo Unu ku ta alkansá lugánan leu manera "fiernu" (sheol, "graf") i "skuridat" (Salmo 139:8, 11, 12), lugánan no típikamente deskribí komo kaminda Dios ta biba (Salmo 56:13). Tambe ta deskribí Su presensia komo esun ku ta tuma "ala di ourora" (ost) pa alkansá "e kosta di mas leu di laman (west) (Salmo 139:9). Loke e imágennan akí ta transmití ta e bèrdat ku no tin niun lugá den universo kaminda nos por ta for di e alkanse di Dios. Aunke Dios no ta parti di e universo, manera algu hende ta kere, E ta serka di tur kos, no solamente El a kre'é, sino E ta sosten'é tambe (wak Hebr. 1:3).

Komo Esun ku sa tur kos tokante nos, Dios por yuda i restourá nos. E realisashon fresku di Su grandesa ta inspirá un eksploshon di alabansa i konfiansa renobá den e salmista. E ta duna bon biní na investigashon divino komo e medio ku por kita kualke kos ku ta peligrá su relashon ku Dios for di su bida.

Algun hende lo haña e echo ku Dios sa asina tantu tokante nan, asta nan sekretonan di mas skur, un pensamentu mas bien spantoso. Di kon, anto, e evangelio ta nos úniko speransa?

39