Les di Sabbatskol

djamars, 23-01-2024

Lesa Salmo 17:7-9, , Salmo 31:1-3, , i Salmo 91:2-7. Kiko e salmista ta hasi den tempu di problema?

E salmista ta topa ku vários sorto di problema i, den nan, ta bira na Señor, kende ta un refugio den tur atversidat. Konfiansa ta un eskoho deliberá pa rekonosé e soberania di Dios riba un hende su bida den tur sirkunstansia. Si konfiansa no ta funshoná den atversidat, e ora ei e lo no funshoná niun kaminda.

E testimonio di e salmista, "bisa SEÑOR: 'Mi refugio, mi fòrti, mi Dios, den kende mi ta pone mi konfiansa"' (Salmo 91:2), ta surgi di su eksperensia di pasado ku Dios i awor ta sirbi pa fortalesé su fe pa futuro. E salmista ta yama Dios e Altísimo i e Omnipotente (Salmo 91:1, 2), rekordando e grandesa di su Dios, ku ta surpasá tur kos.

E salmista ta konta tambe di e seguridat ku un hende por haña den Dios: e "lugá sekreto" ("amparo" òf "lugá di skonde"), "sombra" (Salmo 91:1), "refugio", "fòrti"(Salmo 91:2), "alanan", "eskudo", "harnas" (Salmo 91:4), i "lugá di biba" (Salmo 91:9, , Beibel Santu). E imágennan akí ta representá hafnan sigur den kultura di e salmista. Hende mester djis pensa riba e kayente insoportabel di solo den e parti ei di mundu pa asina apresiá e sombra òf kòrda riba e tempunan di guera den historia di Israel pa asina balorá e seguridat proveé pa e eskudo òf e fòrti.

Lesa Salmo 17:8 i Mateo 23:37. Kua imágen ta usa aki, i kiko e ta revelá?

Un di e metáforanan di mas íntimo ta esun ku ta referí na ta "bou di e sombra di Bo alanan" (Salmo 17:8, Salmo 57:1, , Salmo 63:7). E metáfora akí ta provoká konsuelo i siguransa ku implikashon di e protekshon di un mama para. Ta kompará Señor ku un águila ku ta protehá su yunan ku su alanan (Eks. 19:4, , Deut. 32:11) i ku un galiña ku ta hunta su yunan bou di su alanan (Mat. 23:37).

Kon, sin embargo, nos ta dil ku e momentonan ora kalamidat dal, i ta parse ku nos no por mira e protekshon di Señor? Di kon e troumanan akí no ta nifiká ku Señor no tei huntu ku nos?

41