Les di sabbatskol kuartaal 1, aña 2024, Titula: E BUKI DI SALMO

Les 6: Lo Mi Lanta

PA STUDIA I MEDITÁ:

Lesa pa e siman aki:

Salmo 18:3-18; Salmo 41:1-3; Deut. 15:7-11; Salmo 82; Salmo 96:6-10; Salmo 99:1-4; Rom. 8:34.

TEKSTO PRINSIPAL:

"'Ta pa motibu di opreshon di humildenan i gritu di ousilio di pobernan Mi ta lanta awor,' SEÑOR ta bisa, 'lo Mi salba esun ku tin deseo' " (Salmo 12:5).

djabierne, 09-02-2024

Lesa Ellen G. White, "The Beatitudes," p. 6-13, 29-35, den Thoughts From the Mount of Blessing.

E Salmonan ta un protesta kontra indiferensia humano kontra inhustisia; nan ta un rechaso pa aseptá maldat. Nan ta motivá, no pa un deseo di revancha sino pa un afan pa glorifiká e nòmber di Dios. P'esei, ta kuadra pa e hustunan alegrá nan mes ora ku nan lo mira e vengansa di Dios riba maldat, pasobra di e manera akí e nòmber di Dios i Su hustisia ta keda restourá den mundu (Salmo 58:10, 11). E Salmonan ta obligá hende halsa nan bosnan kontra maldat i buska e binida di e reino di Dios den su plenitut. Den e Salmonan, ta duna nos siguransa di konsuelo i liberashon divino. Señor lo lanta!

"'Ora hende lo zundra boso, i persiguí boso,' Hesus a bisa, 'alegrá boso i keda kontentu.' I El a mustra Su oyentenan na e profetanan ku a papia den nòmber di Señor, komo 'un ehèmpel di sufri aflikshon, i di pasenshi.' Hakobo 5:10. Abel, e promé kristian di e yunan di Adam, a muri komo un mártir. Enók a kana ku Dios, i mundu no a konos'é. Nan a hasi cherchi di Noe komo un fanátiko i un alarmista. 'Otronan tabatin prueba di cherche kruel i tortura, sí, adernas di bui i prizón.' Otronan a sufri tortura, no aseptando liberashon; pa nan por tabatin un mihó resurekshon.' Hebreonan 11:36, 35."-Ellen G. White, Thoughts From the Mount of Blessing, p. 33.

PREGUNTA PA DISKUSHON·

1. Pa motibu ku e realisashon doloroso ku e maldat den mundu por pone hende puntra nan mes si Señor realmente ta reina, kon nos por kultivá un fe firme ku lo para fuerte asta bou di tentashon? Ke men, riba kiko nos mester enfoká pa asina mantené nos fe den e amor i bondat i poder di Dios? Kiko e krus mester bisa nos tokante Dios i Su karakter?

2. Di kon ta importante pa no dependé riba medionan humano (líder, institushon, i movementu sosial) komo e último sabiduria i solushon pa hustisia den mundu sino dependé únikamente riba e Palabra i huisio di Dios?

3. Kua ta implikashonnan práktiko di e bèrdat ku e santuario ta e lugá di huisio divino?

4. Kon nos por komprendé e lenguahe fuerte di algun Salmo? Kon e lenguahe ei ta yuda nos relashoná ku e humanidat di esnan ku a skirbi nan?

66