les di Sabbatskol
otro idioma
Les di sabbatskol kuartaal 1, aña 2024, Titula: E BUKI DI SALMO
Les 6: Lo Mi Lanta
E GUERERO MAHESTUOSO
Lesa pa e siman aki:
Salmo 18:3-18; Salmo 41:1-3; Deut. 15:7-11; Salmo 82; Salmo 96:6-10; Salmo 99:1-4; Rom. 8:34.
TEKSTO PRINSIPAL:
"'Ta pa motibu di opreshon di humildenan i gritu di ousilio di pobernan Mi ta lanta awor,' SEÑOR ta bisa, 'lo Mi salba esun ku tin deseo' " (Salmo 12:5).
djadumingu, 04-02-2024
Lesa Salmo 18:3-18; Salmo 76:3-9, 12; i Salmo 144:5-7. Kon ta deskribí Señor den e tekstonan akí? Kiko e imágennan akí ta transmití tokante Dios su disponibilidat pa libra Su pueblo?
E himnonan akí ta alabá Señor pa Su poder asombroso riba e forsanan di maldat ku ta menasá Su pueblo. Nan ta deskribí Dios den Su mahestat komo Guerero i Hues. E imágen di Dios komo Guerero ta frekuente den e Salmonan i ta destaká e severidat i urgensia di Dios su kontesta riba e gritunan i sufrimentu di Su pueblo.
"Bos di SEÑOR tabata lora na shelu,/ Dios Altísimo a laga su stèm resoná./ El a tira su flechanan/ i plama mi enemigunan,/ El a tolondrá nan ku rayo di kandela./ Hende por a mira fondo di laman,/ fundeshi di tera a Sali na bista/ pa bo gritu di menasa, SEÑOR,/ pa suplamentu pisá fo'i bo nanishi" (Salmo 18:13-15). E determinashon puru i magnitut di Dios su akshon mester plama kualke duda tokante Dios su gran kuido i kompashon pa esnan ku ta sufri òf tokante Su abilidat pa derotá maldat. Nos mester djis warda pa E hasié.
Al final, asta ora e pueblo di Dios, manera David, tabata envolví den guera liberashon no a bini di medionan humano. Den su hopi batayanan kontra e enemigunan di e pueblo di Dios, Rei David a alabá Dios komo e Uniko ku a logra tur e viktorianan. Lo tabata fásil pa David tuma krédito pa loke a sosodé, pa su hopi éksito- i triunfonan, pero esei no tabata su estado di ánimo. E tabata sa for di unda e Fuente di su poder tabata bini.
Aunke David ta deklará ku Señor ta kapasitá su mannan pa guera (Salmo 18:34), niun kaminda den e Salmonan e ta dependé riba su abilidatnan di bataya. En kambio, Señor ta bringa pa David i ta libr'é (Salmo 18:47, 48).
Den e Salmonan, Rei David, ku tabata konosí komo un guerero eksitoso, ta asumí su ròl komo un músiko eksperto i ta alabá Señor komo e úniko Libertador i Sostenedó di Su pueblo (Salmo 144:10-15). Alabansa i adorashon na Señor ta David su fuentenan di fortalesa, ku ta mas poderoso ku kualke arma di guera. Solamente Dios ta di konfia i adorá.
Kualke sea ta e don- i abilidatnan i éksito ku bo tabatin den bida, di kon semper bo mester kòrda e fuente di nan tur? Kua peliger bo ta enfrentá si bo lubidá e fuente ei?
61