Les di Sabbatskol

djarason, 07-02-2024

Lesa Salmo 58:6-8; Salmo 69:22-28; Salmo 83:9-17; Salmo 94:1, 2; i Salmo 137:7-9. Ki sintimentu e Salmonan akí ta transmití? Ken ta e agente di huisio den e Salmonan akí?

Algun Salmo ta implorá Dios pa tuma vengansa riba indivíduo i nashon ku tin intenshon di hasi daño, òf ku ya a hasi daño, na e salmistanan òf nan pueblo. E Salmonan akí por zona aplastante pa motibu di nan lenguahe duru i aparente diskordia ku e prinsipio bíbliko di amor pa enemigu (Mat. 5:44).

Sin embargo, e indignashon di e salmista pa loke ta trata opreshon ta unu bon. E ta nifiká ku e salmista tabata tuma bon i malu mas na serio ku hopi hende tabata hasi. Ta import'é, asta hopi mas, e maldat ku ta hasi den mundu, no solamente na e mes sino na otronan tambe.

Sin embargo, niun kaminda e salmista ta sugerí ku e mes ta e agente di vengansa. En kambio, e ta laga vengansa únikamente den man di Dios. E Salmonan ta lanta e maldishonnan di e pakto divino (Deut. 27:9-16) i ta implorá Dios pa aktua manera El a primintí.

E Salmonan ta proklamashon profétiko tokante e huisio inminente di Dios; nan no ta únikamente orashon di e salmista. Salmo137 ta reflehá e anunsionan di huisio divino riba Babilonia, manera ta mira den e profetanan. E destrukshon ku e babilonionan a trese riba otro nashonnan lo a bira bèk riba nan. E Salmonan ta transmiti atvertensianan divino ku maldat lo no keda sin kastigu pa semper.

E vengansa di Dios ta keda midí ku hustisia i grasia. E yunan di Dios ta yamá pa resa pa esnan ku ta maltratá nan i asta pa spera pa nan kombershon (Salmo 83:18, , Yer. 29:7).

Sinembargo, miéntras nos ta trata na laga e Salmonan akí konkordá ku normanan bíbliko di amor pa enemigu, nos mester ta kuidadoso pa no minimalisá e eksperensia doloroso ekspresá den nan. Dios ta rekonosé e sufrimentu di Su yunan i ta sigurá nan ku"Presioso den bista di SEÑOR ta e morto di Su santunan" (Salmo 116:15, , Beibel Santu). Huisio divino ta obligá e pueblo di Dios pa halsa nan bos kontra tur maldat i buska e binida di e reino di Dios den su plenitut. E Salmonan ta duna bos tambe na esnan ku ta sufri, lagando nan sa ku Dios ta konsiente di nan sufrimentu i ku un dia hustisia lo yega.

Ken, tin biaha, no tabatin pensamentu òf fantasia tokante vengansa riba esnan ku a hasi nan òf nan sernan kerí maldat teribel? Kon e Salmonan akí lo por yuda bo pone sintimentunan asina den e perspektiva korekto?

64