Les di sabbatskol kuartaal 1, aña 2024, Titula: E BUKI DI SALMO

Les 7: Bo Mizerikòrdia ta Alkansá Te Na e Shelunan

SU MIZERIKÒRDIA TA DURA PA SEMPER

Lesa pa e siman aki:

Salmo 136; Salmo 51; Salmo 130; Salmo 113; Salmo 123.

TEKSTO PRINSIPAL:

"Mi ke alabá Bo, Señor, bou di pueblonan, kanta bo gloria bou di nashonnan, pasobra bo amor ta yega te na shelu, bo fieldat ta yega te na nubianan" (Salmo 57:9, l0)

djadumingu, 11-02-2024

Lesa Salmo 136. Kua pensamentu ta prevalesé den e Salmo akí? Unda e salmista ta haña evidensia pa su afirmashon prevalesiente?

Salmo 136 ta konvoká e pueblo di Dios pa alabá Señor pa Su mizerikòrdia manera e ta revelá den kreashon (Salmo 136:4-9) i den historia di Israel (Salmo 136:10-22). "Mizerikòrdia" (hebreo khesed, "amor firme") ta transmití Dios su bondat i lealtat na Su kreashon i na Su aliansa ku Israel. E Salmo ta mustra ku Dios su poder i grandesa enorme ta basá riba Su amor firme.

Señor ta "e Dios di diosnan" i"Señor di señornan", ku ta un modismo hebreo ku ta nifiká "e Dios di mas grandi" (Salmo 136:1-3), no ku tin otro dios, sino ku E ta e úniko Dios.

E gran maravianan di Señor, ku niun hende mas por repliká, ta e demostrashon innegabel di Su domínio (Salmo 136:4). Dios a krea e shelunan, tera, i e astronan, ku e paganonan ta adorá (Deut. 4:19). E Salmonan, sin embargo, ta kita outoridat for di e diosnan pagano, i pa ekstenshon tur fuente di konfiansa humano. Nan ta simplemente produkto di kreashon. Nan ta meramente kosnan kreá-no e Kreador, un distinshon krusial.

E imágen di Señor su man fuerte i brasa ekstendé (Salmo 136:12) ta enfatisá e efikasia di e poder di Dios i e dominio amplio di Su mizerikòrdia.

Dios su mizerikòrdia den kreashon i historia mester inspirá Su pueblo pa konfia den djE i pa keda fiel na Su aliansa. Ta ripití e refran "Pasobra Su mizerikòrdia ta dura pa semper" 26 biaha den e Salmonan, sigurando e adoradónan ku Señor no ta kambia i lo ripití Su fabornan di pasado na kada generashon nobo. Dios ta kòrda riba Su pueblo (Salmo 136:23) i ta fiel na Su pakto di grasia. E kreensia den Señor su mizerikòrdia eterno ta sentral den fe bíbliko, ku ta inkluí adorashon alegre i konfiansa, tambe reserva i arepentimentu.

Salmo 136 (v. 23-25) ta sera ku Dios su kuido universal pa mundu. E mizerikòrdia di Dios ta ekstendé no solamente na Israel sino na henter kreashon. E Salmo pues ta papia di e universalidat di Dios su grasia salbador i ta amonestá henter mundu pa uni ku Israel su alabansa di Señor (wak tambe Lukas 2:10, , Huan 3:16, , Echonan 15:17).

Kon e imágen di Hesus riba e krus, muriendo komo un Sustituto pa nos pikánan, ta revelá di forma mas poderoso e gran bèrdat tokante Dios, ku "Su amor ta dura pa semper"?

72