Les di sabbatskol kuartaal 1, aña 2024, Titula: E BUKI DI SALMO

Les 7: Bo Mizerikòrdia ta Alkansá Te Na e Shelunan

KREA DEN MI UN KURASON LIMPI

Lesa pa e siman aki:

Salmo 136; Salmo 51; Salmo 130; Salmo 113; Salmo 123.

TEKSTO PRINSIPAL:

"Mi ke alabá Bo, Señor, bou di pueblonan, kanta bo gloria bou di nashonnan, pasobra bo amor ta yega te na shelu, bo fieldat ta yega te na nubianan" (Salmo 57:9, l0)

djaluna, 12-02-2024

Lesa Salmo 51:1-5. Di kon e salmista ta apelá na e mizerikòrdia di Dios?

Rei David ta drama su kurason dilanti di Señor, pidiendo pa pordon di piká durante e momentonan spiritual di mas skur di su bida (2 Samuel 12). Pordon ta e don ekstraordinario di grasia di Dios, resultado di e Dios su "inmenso kompashon" (Salmo 51:1). Rei David ta apelá na Dios pa atendé kuné, no di akuerdo ku loke su piká meresé (Salmo 103:10) sino di akuerdo ku Su karakter divino, ke men, Su mizerikòrdia, fieldat, i kompashon (Salmo 51:1; Eks. 34:6, 7).

Lesa Salmo 51:6, -19. Kon ta deskribí pordon di piká akinan? Kua ta e meta di pordon divino?

Pordon divino ta envolví mas ku un proklamashon legal di inosensia. E ta produsí un kambio profundo ku ta alkansá e partinan di mas interno di ser humano (Salmo 51:6, Hebr. 4:12). E ta produsí un kreashon nobo (Salmo 51:10, , Huan 3:3-8). E verbo hebreo bara', tradusí "krea", ta deskribí poder divino kreativo (Gén. 1:1). Solamente Dios por bara'; solamente Dios por produsí un kambio radikal i duradero den kurason di e persona ku repentí (2 Kor. 4:6).

David ta pidi purifikashon ku hisopo (Lev. 14:2-8, , Salmo 51:7). E ta sinti ku su kulpa ta ten'é for di presensia di Señor, di mes manera ku e leproso ta mantené for di e komunidat miéntras e estado di impuresa ta dura (Salmo 51:11). E ta teme ku sakrifisio no por restour'é kompletamente pasobra no tabatin niun sakrifisio ku por a ekspiá pa su pikánan premeditá di adulterio i asesinato (Eks. 21:14, , Lev. 20:10).

Solamente grasia divino inkondishonal por a aseptá David su "kurason kibrá i arepentí" komo un sakrifisio i restourá David bek den harmonia ku Dios (Salmo 51:16, 17). Pidiendo purifikashon ku hisopo, e ke bai bèk na e presensia di Dios.

Si Dios por pordoná David pa adulterio, engaño, i asesinato, ki speransa ta eksistí pa bo?

73