Les di sabbatskol kuartaal 1, aña 2024, Titula: E BUKI DI SALMO

Les 7: Bo Mizerikòrdia ta Alkansá Te Na e Shelunan

SI ABO, SEÑOR, MESTER A SEÑALÁ INIKIDAT

Lesa pa e siman aki:

Salmo 136; Salmo 51; Salmo 130; Salmo 113; Salmo 123.

TEKSTO PRINSIPAL:

"Mi ke alabá Bo, Señor, bou di pueblonan, kanta bo gloria bou di nashonnan, pasobra bo amor ta yega te na shelu, bo fieldat ta yega te na nubianan" (Salmo 57:9, l0)

djamars, 13-02-2024

Lesa Salmo 136. Kua pensamentu ta prevalesé den e Salmo akí? Unda e salmista ta haña evidensia pa su afirmashon prevalesiente?

E gran aflikshon di e salmista ta relashoná ku e pikánan di e mes i di su pueblo (Salmo130:3, 8). E pikánan di e pueblo ta asina grave, ku nan ta menasá di separá e pueblo for di Dios pa semper (Salmo 130:3). Skritura ta papia di registro di pikánan ku ta wardá pa e Dia di Huisio (Dan. 7:10, , Rev. 20:12) i di nòmbernan di pekadónan ku ta kitá for di e buki di bida (Eks. 32:32, , Salmo 69:28, , Rev. 13:8). E salmista pues ta apelá na e pordon di Dios, ku lo eradiká e registro di piká (Salmo 51:1, 9; Yer. 31:34; Mik. 7:19). E sa ku "Dios no ta rabiá pa naturalesa. Su amor ta eterno. Su 'rabia' ta lanta solamente pa motibu di hende su fayo di apresiá Su amor... E propósito di Su rabia no ta pa heridá, sino mas bien pa sana hende; no pa destruí sino pa salba su pueblo di pakto (wak Hos. 6:1, 2)."-Hans K. LaRondelle, Deliverance in the Psalms (Berrien Springs, MI: First Impressions, 1983), p. 180, 181. Ta remarkabel ku, ta Dios su disponibilidat pa pordoná piká, i no pa kastigá nan, ku ta inspirá reverensia di Dios (Salmo 130:4, , Rom. 2:4). Adorashon outéntiko ta konstruí riba atmirashon di e karakter di amor di Dios, no riba miedu di kastigu.

E yunan di Dios ta yamá pa spera riba Señor (Salmo 27:14, , Salmo 37:34). E palabra hebrea qawah, "spera", ta nifiká literalmente "rèk", i ta e rais di e pa­ labra hebrea pa "speransa". Pues, spera riba Señor no ta un sumishon pasivo na sirkunstansianan miserabel, sino mas bien un "rèkmentu" yen di speransa òf antisipashon ansioso di e intervenshon di Señor. E speransa di e salmista ta basá no riba su optimismo personal, sino den e Palabra di Dios (Salmo 130:5). Spera fielmente riba Señor no ta en bano, pasobra, despues di e anochi skur, e mainta di liberashon divino ta yega.

Wak kon e súplika personal di e salmista ta bira esun di henter e komunidat (Salmo 130:7, 8). E bienestar di e individuo ta inseparabel for di esun di henter e pueblo. Pues, un hende no ta resa solamente pa e mes sino pa su komunidat. Komo kreyente, nos ta parti di un komunidat, i loke ta impaktá un parti di e komunidat ta impaktá tur hende.

Pensa riba e pregunta: "Si Bo kòrda nos pikánan, SEÑOR, ken lo por wanta bo huisio (Salmo130:3). Kiko esei ta nifiká pa bo personalmente? Unda lo bo tabata si Señor tabata kòrda bo pikánan?

74