Les di sabbatskol kuartaal 1, aña 2024, Titula: E BUKI DI SALMO

Les 7: Bo Mizerikòrdia ta Alkansá Te Na e Shelunan

ALABANSA NA E DIOS MAHESTUOSO I MIZERIKÒRDIOSO

Lesa pa e siman aki:

Salmo 136; Salmo 51; Salmo 130; Salmo 113; Salmo 123.

TEKSTO PRINSIPAL:

"Mi ke alabá Bo, Señor, bou di pueblonan, kanta bo gloria bou di nashonnan, pasobra bo amor ta yega te na shelu, bo fieldat ta yega te na nubianan" (Salmo 57:9, l0)

djarason, 14-02-2024

Lesa Salmonan 113 i 123. Kua ta e dos diferente aspektonan di e karakter di Dios ku ta deskribí den e Salmonan akí?

Salmonan 113 i 123 ta alabá tantu e mahestat komo mizerikòrdia di Señor. E mahestat di Señor ta revelá den e grandesa di Su nòmber i den e lugá eksaltá di Su trono, ku ta riba tur nashon i riba e shelunan (Salmo 113:4, 5; Salmo 123:1). "Ken ta manera SEÑOR nos Dios" (Salmo 113:5) ta un deklarashon di fe ku niun poder denter òf pafó di mundu por desafiá e Dios di Israel.

E echo ku Señor ta dispuesto pa "humiliá Su mes" òf "ta wak te den fondo abou pa mira shelu i tera" ta ilustrá e halturanan inalkansabel kaminda Señor ta biba (wak Salmo 113:6, énfasis añadí). Dios su bibamentu riba haltura no ta previniE di mira loke ta sosodiendo aki bou. E mizerikòrdia di Señor ta manifestá su mes den Su disposishon pa ta envolví ku e mundu i pa salba esnan den nesesidat i pober di nan problemanan. Su man generoso opviamente no ta skondí pa Su sirbidónan, aunke Su lugá di biba ta den shelunan leu.

E grandesa i kuido di Dios, ku no por diserní kompletamente den e transendensia asombroso di Dios, ta bira eksplísito den Dios su aktonan di mizerikòrdia i kompashon. Esnan den nesesidat, e pobernan, i esnan oprimí kisas por eksperensiá di bon fuente Dios su poder soberano den e invershonnan notabel ku E por realisá na nan fabor. E Dios eksaltá ta manifestá Su grandesa usando Su poder pa eksaltá esnan abatí. E hendenan ta liber pa aserká Señor pasobra Su mahestat i supremasia soberano no ta kambia e echo ku E ta nan Kreador i Sostenedó mizerikòrdioso i ku e hendenan ta Su sirbidónan, Su yunan stimá. Adorashon ta, por lo tantu, motivá, no solamente pa Dios su grandesa sino tambe pa Su bondat. Alabansa no ta limitá pa tempu i espasio (Salmo 113:2, 3). E grandesa i mizerikòrdia di Dios ta manifestá mihó den Hesu-Kristu, kende tabata dispuesto pa baha bin abou for di shelu i laga bah'E asina abou manera morto riba krus, pa asina halsa humanidat kaí (Fil. 2:6-8). Aki, den e krus, nos tin e motibunan di mas grandi posibel pa adorá i alabá Dios pa loke El a hasi pa nos.

Reflekshoná riba e krus i loke a sosodé ayá pa bo personalmente. Di kiko Hesus a salba bo? Di kon ta asina importante pa mantené e krus, na promé luga den bo mente?

75