Les di Sabbatskol

djarason, 21-02-2024

Lesa Salmo 141. Pakiko e salmista ta resa?

Salmo 141 ta un orashon pa protekshon for di tentashonnan di paden i pafó. E salmista no ta solamente peligrá pa e mañanan di e malbado (Salmo 141:9, 10) sino ta tentá tambe pa aktua meskos ku e malbado. E promé punto débil ta dominio propio den papiá, i e salmista ta resa pa Señor pone un vigilante na porta di su lepnan (Salmo141:3). E imágen akí ta referí na e vigilansia di portanan di stat ku, den tempunan bíbliko, tabata protehá e stat.

E tentashon ta tambe si e yu di Dios lo sede na e konseho di e hustu òf laga e delikadesanan di e malbado sedusié ( Salmo 141:4, 5). E salmista ta deskribí su kurason komo un menasa prinsipal pasobra ta ei e bataya real ta tuma lugá. Solamente orashon insesante di konfiansa total i dedikashon na Dios por salba e yu di Dios for di tentashon (Salmo 141:2).

Lesa Salmo 1:1 i Salmo 141:4. Kon ta deskribí e karakter progresivo i astuto di tentashon akinan?

Salmo 141:4 ta deskribí e naturalesa progresivo di tentashon. Na promé lugá, e kurason ta inkliná pa ku maldat. Na di dos lugá, e ta praktiká aktonan malbado (e nifikashon na hebreo ta suprayá e karakter repititivo di e akshon). Na di tres lugá, e kurason ta kome di e delisianan di e malbado, ke men, e ta aseptá e práktikanan malbado komo algu deseabel.

Di mes manera, den Salmo 1:1 tentashon ta bini pa prevení e yu di Dios di kana den e kaminda di Señor, poniendo ku e ta kana ku e malbado, ta para riba e kaminda di pekadónan, i, finalmente, ta sinta huntu ku esnan ku menospresio. Pekadó, malbado, i ku menospresio: nos no mester ta meskos ku nan òf laga nan alehá nos for di Señor.

E Salmonan ta deskribí e karakter progresivo, seduktor, i astuto di tentashon, loke ta suprayá e echo ku dependensia total riba Señor so por sigurá un hende su viktoria. E Salmonan ta enfatisá e importansia di e palabranan ku un hende ta papia, i ta skucha, meimei di tentashon. E final di tantu e malbado komo e hustu mester siña e hendenan buska sabiduria di Dios (Salmo 1:4-6, , Salmo 141:8-10). Sin embargo, den tur dos Salmo, e hustifikashon final di e yunan di Dios ta permanesé den futuro. Esaki ta nifiká ku ta yama e kreyentenan pa konfia Dios ku pasenshi i pa spera riba djE.

86