Les di sabbatskol kuartaal 1, aña 2024, Titula: E BUKI DI SALMO

Les 9: Bendishoná ta Esun Ku ta Bini den Nòmber di Señor

PA STUDIA I MEDITÁ:

Lesa pa e siman aki:

Salmo 23; Huan 10:11-15; Salmo 22; Salmo 89:27-32; Kol. 1:16; Salmo 2; Hebr. 7:20-28.

TEKSTO PRINSIPAL:

"E piedra, rechasá p'e trahadónan, esei a bira piedra prinsipal; ta trabou di SEÑOR esei, ta algu milagroso pa mira!" (Salmo 118:22, 23).

djabierne, 01-03-2024

Lesa Ellen G. White, "God With Us," p. 19-26, den The Desire of Ages.

Siendo tantu orashon di Kristu komo orashon tokante Kristu, e Salmonan ta proveé un revelashon úniko di e persona di Kristu i Su ministerio di redenshon komo Esun ku ta "Dios ku nos" (Mat. 1:23). Hesus ta "Dios ku nos" den e orashonnan di bataya di abandono i sufrimentu. E ta "Dios ku nos" den e gritunan pa hustisia i liberashon. Hesus ta "Dios ku nos" ya ku e no ta bandoná nos den nos perdishon i desesperashon, sino ta mustra nos e kaminda di fe viktorioso. El a bira pa nos e Saserdote i Rei eterno pa salba nos di e destino eterno di piká. Den Kristu, e Rei davídiko perfekto, tur Dios su promesanan solem di salbashon ta haña nan kumplimentu (2 Kor. 1:20).

Di forma kla Ellen G. White ta deskribí e unidat di Kristu ku humanidat:
"Pa medio di Su humanidat, Kristu a toka humanidat; pa medio di Su divinidat, E ta tene na e trono di Dios. Komo Yu di hende, El a duna nos un ehèmpel di obediensia; komo Yu di Dios, E ta duna nos poder pa obedesé. Tabata Kristu Esun kende a papia ku Moises for di e mata riba Seru Horeb bisando: 'AMI TA ESUN KU MI TA  Bisa e israelitanan asin'aki: 'Esun yamá AMI TA a manda mi serka boso.' Eks. 3:14. Esaki tabata e promesa di liberashon di Israel. Pues ora El a bini 'den semehansa di hende', El a deklará Su mes e AMI TA. E Yu di Betlehem, e Salbador mansu i humilde, ta Dios 'manifestá den karni'. 1 Tim. 3:16. I na nos E ta bisa: 'AMI TA e Bon Wardadó'. 'AMI TA e Pan bibu'. 'AMI TA e Kaminda, e Bèrdat, i e Bida'. 'Tur poder a ser duná na Mi den shelu i riba tera'. Huan 10:11; 6:51; 14:6; Mat. 28:18. AMI TA e siguransa di tur promesa. AMI TA; no tene miedu."-The Desire of Ages, p. 24, 25.

PREGUNTA PA DISKUSHON:

1. Kon Dios a demostrá Su fieldat firme na Su aliansa a pesar di e infidelidat di e pueblo? Ki siguransa esei ta trese pa e yunan di Dios ku ta luchando awe?

2. Kon e saserdosio úniko i superior di Kristu di akuerdo ku e órden di Melkisedek ta fortalesé e sertesa di salbashon di e pueblo di Dios?

3. E Evangelionan ta mustra ku hopi promesa mesiániko den e Salmonan a kumpli den Hesu-Kristu. Kon esaki ta demostrá e verasidat di e Palabra di Dios? Di kon nos mester resistí kualke i tur sintimentu ku tin tendensia di debilitá nos konfiansa den e Palabra di Dios?

4. Ki gran konsolashon nos por haña for di e palabranan di Kristu: "A entregá Mi tur outoridat riba mundu i den shelu" (Mat. 28:18)? Kon nos ta apliká e promesa akí na nos propio eksperensia?

101