03-01-2022

Bo tabata sa ku…blachi Ginkgo Bilopa ta yuda mehorá e sirkulashon di sanger den bo selebro (nan)?

Ginkgo ta pertenesé na e famia di mata ku a floresé 180 mion di aña pasa i ku a muri ku eksepshon di e espesie aki. Ginkgo ta bini di China originalmente i awendia e ta krese sin niun klase di problema den Oropa. E blachi di Ginkgo ta kontene flavonoidenan aktivo (ta bini den berdura i fruta i tin un efekto antioksidante), ku ta kaptura e radikal nan liber na haltura di bo ‘’netvlies’’ i bo selebronan.

Ginkgo ta yuda habri kanalnan pa sanger pasa, pues e ta regula sirkulashon i ta yuda baha preshon. Di forma ku e kurason no tin ku pòmp duru pa sanger pasa. Ademas e ta redusí e velosidat di behes selebral, den kua problemanan ku balansa (evenwichtstoornis), pitamentu di orea i perdementu di memoria ta wòrdu mehorá.

Ta bon pa bo sa ku.. Ginkgo Bilopa por wòrdu haña komo pildora of puiru.

29-11-2-21

Bo tabata sa ku…Valerian ta yuda kombati nerviosismo i problema ku drumimentu ?

Valerian ta bini di Oropa i ta krese den areanan ku ta kubrí ku yerba bèrdè i vegetashon, kaminda e tera ta humedo kantu di kosta i awa dushi. Nan ta matanan ku “stengel ” i su rais ta konsistí di un  klòmpi di tera i wòrtel. Nan ta krese entre mitar meter pa 1 meter i mitar di largura i ta floresé entre Juni i òugustus ku flornan di kolo ros kla. E parti ku ta wòrdu uza ta e wòrtel.

E wòrtel ta kontené un zeta volatil i e valepotriatonan “ Valepotriaten ” tin un efekto ku ta duna kalmo super efektivo. Valerian ta wòrdu uza ku eksito pa kombati nerviosidat, stres, insomio, i ansiedat prome ku traha  èksamen. E por wòrdu uza tambe pa kombati adikshon na tabako. Tin persona ku ta huma pa baha stres i nerviosismo, pues Valerian ta minimalisá nerviosidat i stres i ta baha (na hasta kita) e nesesidat di huma.

Ta bon pa bo sa ku…Valerian kombiná ku sigaria ta desagradabel i tin un efekto positivo riba kombati adikshon na tabako.

17-10-2021

Bo tabata sa ku…venkel ta bon pa digestion i problema ku gas?

Venkel su origen ta bin di e parti mediteranio oriente i Kaukasus, pero awendia por hañe rònt Europa. E blachi fininan i e simianan di e mata venkel tin un holo i sabor similar ku anis.

E mata venkel ta kontené un zeta ku ta evaporá fasilmente ku tin efekto preventivo riba muskulonan ku ta kontrae (ku por duna masha dolo o un dolo skèrpi). Pues e ta bon pa kombati dolo di stoma i tripa ku sa bin dor di kome lihe, inregular o demasiado pika (kuminda pikante). E ta kombati tambe sintomanan di barika hincha i sakamentu di gas dor di su influensa positivo riba e kanal digestivo.

Ta bon pa bo sa ku…venkel ta stimulá produkshon di lechi serka mama nan ku ke mamanta nan yu.

19-9-2021

Bo tabata sa ku…artishòk ta bon pa ora ta trata problema ku igra?

Un gran kantidat di Artishòk ta wòrdu kosechá na Fransia. Artishòk ta hopi konosí pa e konòpi di flor ku pa gastronomo ta wòrdu konsiderá un delikatesa. Pa fysioterapistanan e blachinan ta sumamente interesante. Artishòk miho konosí komo e mata ku ta protehá e igra.

Un parti masha importante di e blachi ta ‘’Cynarine’’, un substansia ku ta promové produkshon i dekomposishon dor di gal ku ta wòrdu traha den igra. Pa e motibu ei e blachi di artishòk ta wòrdu uza pa problemanan ku igra i ‘’galblaas’’. Indirektamente e por mehorá e tripa su trabou dor ku e ta kombati mal funshonamentu di igra. Artishòk tin otro subtansia nan tambe ku ta protehá e selulanan di igra i restorá nan. E por yuda detoksifika e igra di uzo eksesivo di alkohol, yuda stimula digestion, i baha kolesterol.

Ta bon pa bo sa…ku artishòk tambe ta bon pa purifiká sanger.

09-08-2021

Ta bon pa bo sa ku…vitamina B ta indespensabel pa e bon funshonamentu di e sistema nervioso i imun.

Bo tabata sa ku…awakati ademas di ta riku ku vèt saludabel e ta riku tambe ku vitamina B?

Vitamina B den su totalidat tin masha hopi benefisionan i ta di sumo importansia pa e kurpa humano. Algun investigashon ta sugerí ku vitamina B12 por yuda redusídepreshon i ansiedat den sierto kasonan. Vitamina B ta importante tambe pa hende muhenan ku tin pensá pa sali na estado o ta na estado pa tuma sufisiente B9 (folic acid-foliumzuur). Muhe nan na espera mester di sufisiente B12.

Estudionan ta mustra ku defisienia di B12 por kousa perdida di yu, poko peso na nasementu o sierto konsekuensia nan abormal pa e beibi.  Alternativa nan ku tin hopi vitamina b ku no ta produktonan animal ta awakati, nechi o blachinan berde (“boerenkool”, spinashi, kolo, èts). Awakati por ehèmpel ta riku ku vitamina D. Pa kada 100 gram di awakati tin B5; 1.39 miligram (mg) ku ta 28% di e kantidat ku hende mester pa dia. Vitamina B6 tin 0.26mg (15%), B2 0.13mg (10%), B3 1.74mg (11%), B1 0.07 (6%), B9 81 mcg (20%). Ta importante pa tuma nota ku vitamina B indespensabel pa un kurpa saludabel yen di energia.

Ta bon pa bo sa…ku por introdusí awakati, nechi i berduranan bèrde na diferente manera nan kreativo den bo dieta.

Fuente: https://www.medicalnewstoday.com/articles/324856#side-effects-and-risks